Պաշտոնական Բաքուն հայտարարեց, թե Ադրբեջանը ԵՄ-ին զիջումներ է արել` ստորագրելով Ռիգայում տեղի ունեցած «Արեւելյան գործընկերության» գագաթնաժողովի հռչակագիրը: Իսկապե՞ս դա զիջում էր կամ հայկական կողմի ձեռքբերում, երբ ԼՂ-ի խնդրի վերաբերյալ կետում չնշվեց հակամարտության կարգավորման հիմնարար սկզբունքներից` «տարածքային ամբողջականությունը»: ՀՀ ԱԳՆ ՆԱՏՕ-ի բաժնի նախկին վարիչ, այժմ Ժողովրդավարության, անվտանգության եւ զարգացման հայկական կենտրոնի փորձագետ Մարթա Այվազյանն «Առավոտ»-ի հետ զրույցում այս հարցի առնչությամբ նշեց. «Գագաթնաժողովի հռչակագրի մասին՝ առ այսօր կայացած «Արեւելյան գործընկերության» չորս գագաթնաժողովներից եւ ոչ մեկի հռչակագրում չի եղել մասնավոր հղում հակամարտությունների կարգավորման հիմնարար սկզբունքներից որեւէ մեկի վրա: Բոլոր չորս հռչակագրերում օգտագործվել է «հակամարտությունների խաղաղ կարգավորում միջազգային իրավունքի սկզբունքների եւ նորմերի հիման վրա» ընդհանրական ձեւակերպումը: Այնպես որ՝ այս առումով ես չեմ տեսնում ոչ զիջում եւ ոչ էլ որեւէ ձեռքբերում»:
