«Ոչ թալանին» նախաձեռնության անդամները տեղեկացնում են, որ հունիսի 19-ին Ազատության հրապարակում կրկին էլեկտրաէներգիայի սակագնի թանկացման դեմ բողոքի երթ է լինելու:
Նախաձեռնության անդամ Լեւոն Զաքարյանն այսօր «Հայացք» ակումբում անդրադառնալով մտավախությանը, թե հունիսի 19-ի հավաքն ուշացած է այն առումով, որ հանրային ծառայությունները կարգավորող հանձնաժողովն արդեն իր դիրքորոշումը հայտնած կլինի, ասաց. «Հանձնաժողովի դիրքորոշումը լինի մի քանի օր շուտ կամ ուշ, միեւնույն է լինելու: Կարեւորը քվեարկության օրն , այն, իմ տեղեկություններով, հուլիսի 1-ն է: Եվ իհարկե, կարեւորը մեր դիրքորոշումն է, իսկ այն հստակ է՝ ոչ մի կոպեկ ավելի»:
Նախաձեռնության անդամ Մաքսիմ Սարգսյանն էլ շարունակեց. «Մեզ չեն գոհացնում իշխանական բուրգի հնչեցրած հայտարարությունները, թե հոսանքի թանկացումն այլընտրանք չունի: Նախորդ երթով, որը տեղի ունեցավ մայիսի 27-ին, մեկնարկ տրվեց պայքարին, իսկ հունիսի 19-ի երթը պահանջատիրական երթ է լինելու: Այս երթով մենք ցույց ենք տալու, որ մենք տեր ենք մեր պայքարին և հետ չենք կանգնելու»:
Լեւոն Զաքարյանը, անդրադառնալով երեկ ՀՀԿ խոսնակ Շարմազանովի դիտարկմանը, որ եթե չենք ուզում շոու սարքեն, պետք է խորհրդարանական լսումները սակագնի բարձրացման վերաբերյալ փակ լինեն, ասաց. «Եթե հարցը վերաբերում է հանրությանը, ի՞նչ գաղտնիքներ ունեն սեփական ժողովրդից, որ փակ ֆորմատով անցկացնեն: Քննարկումները պետք է բաց ֆորմատով լինեն, որ պարզ դառնա՝ ով ինչ մոտեցում ունի հարցի վերաբերյալ: Չնայած ԱԺ-ի նման շոուներին ականատես ենք եղել, այնպես որ եւս մեկին մասնակից լինելուց չենք հրաժարվի»:
Կարդացեք նաև
«Դա թելադրված սակագին է, իշխանություններին մնում է միջոցներ ձեռնարկել հանրությանը ներկայացնելու, թե նորմալ է ամեն ինչ»,-եզրահանգեց նախաձեռնության անդամներից Արամ Մանուկյանը:
Արփինե ՍԻՄՈՆՅԱՆ
