Վարչական դատարանում դատավոր Կարեն Զարիկյանի նախագահությամբ հունիսի 5-ին սկսվեց «Իրազեկ քաղաքացիների միավորում» խորհրդատվական հասարակական կազմակերպության ընդդեմ դատախազության հայցի քննությունը:
Դատախազությունը ներկայացնում էր Կարապետ Հակոբյանը, իսկ հայցվոր կողմը չէր ներկայացել: Դատավորը նկատեց, որ կողմը պատշաճ ծանուցված է եղել: Նա ասաց, որ «Իրազեկ քաղաքացիների միավորում» խորհրդատվական հասարակական կազմակերպությունը հարցումով դիմել է գլխավոր դատախազին, որ իրենց էլեկտրոնային հասցեին ուղարկեն այն գրության լուսապատճեն, որով ՀՀ գլխավոր դատախազը ՌԴ գլխավոր դատախազ Յուրի Չայկայից խնդրել է հունվարի 12-ին Գյումրիում տեղի ունեցած սպանության գործի վարույթը փոխանցել ՀՀ իրավապահ մարմիններին:
Կարապետ Հակոբյանը նշեց, որ խորհրդատվական հասարակական կազմակերպությունը այդ հարցումն արել է 2015 թվականի փետրվարին: Կարեն Զարիկյանը հավելեց, որ դատախազությունը ի պատասխան հարցման հայտնել է, որ սպանության դեպքի առթիվ վարույթը փոխանցելու վերաբերյալ դատախազի միջնորդությունը, միջազգային փաստաթղթերը տեղակայված են դատախազության կայքի լրահոս բաժնում եւ կից ներկայացրել է լրահոս բաժնի տեղեկությունները:
Դատարանն արձանագրեց, որ «Իրազեկ քաղաքացիների միավորում» խորհրդատվական հասարակական կազմակերպության պահանջը հստակ չէ, մասնավորապես՝ հայցադիմումով ձեւակերպվել է պարտավորեցնել դատախազությանը օրենքով սահմանված կարգով պատասխանել հարցմանը: Սակայն դատավորը նկատեց, որ հայցվորը չի նշել, թե ի՞նչ պատասխան է ակնկալում:
Կարդացեք նաև
Դատարանը որոշեց առաջարկել հայցվոր կողմին ճշտել ոչ հստակ հայցային պահանջը: Նա հավելեց, որ առաջարկը գրավոր տեսքով կուղարկի հայցվորին, վերջինիս արձագանքից հետո հնարավոր կլինի անդրադառնալ գործի քննության ընթացքին:
Ամի ՉԻՉԱԿՅԱՆ
