ՀՀ ԱԺ-ն արտահերթ նստաշրջանում քննարկում է «Ակցիզային հարկի մասին» ՀՀ օրենքում լրացումներ եւ փոփոխություններ կատարելու մասին կառավարության որոշումը: Պատգամավորները կրկին ունեն դժգոհություններ: Հիմնական դժգոհությունն այն է, որ ակցիզային հարկը վեց դրամով թանկացնում են:
ՀՀ ԱԺ ԲՀԿ խմբակցության քարտուղար Վահան Բաբայանը վստահեցրեց, որ ակցիզային հարկի բարձրացումը կապված է շարքային քաղաքացու գնողունակության հետ: Այնուհետև հետաքրքրվեց` ինչո՞ւ միջազգային բրենդային դիզվառելիքի կազմակերպություններ ՀՀ չեն գալիս, կամ ինչո՞ւ «Մաքդոնալդսը» չի գալիս Հայաստան: Հիմնական զեկուցող ՀՀ ֆինանսների փոխնախարար Վախթանգ Միրումյանը պատասխանեց. «Պատճառը շուկայի տարողունակությունն է: ՀՀ շուկան փոքր է, դրա պատճառը կարող է լինել հենց դա»:
ՀՀ ԱԺ պատգամավոր Էդմոն Մարուքյանը հայտարարեց, թե «այս նեղ մաջալին ի՞նչ իմաստ ունի այս թանկացումը», առանց այդ էլ հոսանքը թանկացել է, ու այս ակցիզային հարկի թանկացումը բերելու է բազում ապրանքների թանկացման: Պարոն Մարուքյանի տեղեկացմամբ` տեղական արտադրողներն ուղղակի սարսափած են:
Կարդացեք նաև
ՀՀ ֆինանսների փոխնախարար Վախթանգ Միրումյանը փորձեց հանգստացնել, թե 2016-ի հունվարի 1-ից է նախագիծը ուժի մեջ մտնելու:
ՀՅԴ խմբակցության պատգամավոր Արծվիկ Մինասյանը նկատեց, թե այս որոշմամբ հարված ենք հասցնում գնողունակությանը, փոքր ու միջին բիզնեսին, այնինչ պաշտպանում ենք բենզինի ու դիզվառելիքի ներմուծողների շահերը, իբր քիչ են պաշտպանված: Արծվիկ Մինասյանը մտավախություն ունի, որ այս որոշումը արտահերթով է բերվել, որ ուղղակի անցկացվի և հանձնաժողովը չհասցնի պատշաճ քննարկում կազմակերպել: Ըստ պատգամավորի `«սա ակնհայտորեն հակասում է հարկային և տնտեսական քաղաքականության սահմանադրական մոտեցումներին»:
ԱԺ ՀՀԿ խմբակցության պատգամավոր Հակոբ Հակոբյանը սա բնորոշեց որպես « փռշտացող նախագիծ» ու նշեց, թե փորձառու պատգամավորները գիտեն, թե ինչպես են այսպիսի նախագծերը վարչապետի մոտ անցկացնում:
ԱԺ տնտեսական հարցերի մշտական հանձնաժողովի նախագահ Վարդան Այվազյանը ևս քննադատեց այս նախագիծը ու նաև շեշտեց, թե չեն էլ հասցրել քննարկել այն: Նաև ակնարկեց տրանսպորտի ուղեվարձի թանկացման մասին, եթե բարձրացվի ակցիզային հարկը:
ԱԺ պատգամավոր Տիգրան Ուրիխանյանը նկատեց, որ կառավարությունը մոլորության մեջ է ու հայտարարեց. «Հոսանքի գինը թանկացավ, հորով մորով արեցինք, հիմա էլ գազի, բենզինի գինն են ուզում թանկացնել: Օր ու գիշեր քնում մտածում եք, թե ինչից են մարդիկ զանգվածաբար օգտվում, որ բարձրացնեք գի՞նը: Այդ ինը միլիարդը ձեր փայլուն ծառայողականների վրա՞, ձեր պետական վառելիքի՞ վրա եք ծախսելու»:
Տաթև ՀԱՐՈՒԹՅՈՒՆՅԱՆ
