«Ոչ թալանին» քաղաքացիական նախաձեռնության անդամները երթով շարժվել են դեպի Բաղրամյան փողոց, որտեղ նրանց դիմավորեց ոստիկանական պատնեշը: Այս պահին ցուցարարները Գրողների տան մոտակայքում են, նրանք նստած են փողոցում, իսկ ոստիկանները` Սահմանադրական դատարանի մոտ:
Այստեղ է նաեւ Երեւանի ոստիկանապետ Աշոտ Կարապետյանը: Եւ նա, եւ Վալերի Օսիպյանը լրագրողներին տեղեկացրեցին, որ նախագահ Սերժ Սարգսյանը պատրաստակամություն է հայտնել ընդունել ակցիայի մասնակիցներից չորս հոգանոց պատվիրակությանը:
Ակցիայի մասնակիցները, սակայն հրաժարվում են նախագահի մոտ պատվիրակներ ուղարկելուց, նրանք պահանջում են, որ նախագահը անձամբ հանդիպի ցուցարարներին: Ծայրահեղ դեպքում` նախագահականից որեւէ մեկը իջնի իրենց մոտ:
Կարդացեք նաև
Ակցիայի ժամանակ «Չենք վճարելու», «Մենք ենք որոշողը» կարգախոսներից բացի երբեմն-երբեմն հնչում է նաեւ` «Սերժիկ հեռացիր» կարգախոսը:
Ակցիայի մասնակիցները մեկ վանկարկում են տարբեր կարգախոսներ, մեկ ազգագրական երգեր են երգում, մեկ սուլում եւ բարձր ձայնով գոռում:
Որոշ տեղեկություններով այստեղ է նաեւ ՀՀ ոստիկանապետ Վլադիմիր Գասպարյանը:
Մանրամասներն` առաջիկայում:
Նելլի ԳՐԻԳՈՐՅԱՆ
