Հայաստանի Ստրասբուրգյան կոմիտեի հիմնադրման գաղափարը պայմանավորված է երեք տարի առաջ ԵԽԽՎ-ի ընդունած մի բանաձեւով, որը հստակեցնող չափանիշներ է սահմանում քաղբանտարկյալների համար: Այսօր այդ մասին, կոմիտեի հիմնադիր համագումարի ժամանակ ասաց ՀԱԿ-ը ներկայացնող Սամվել Աբրահամյանը: «Այս ընթացքում Հայաստանում գործընթացներ են զարգացել, արդեն քաղաքացիական ակտիվիստներ են ձերբակալվում»,- ասաց բանախոսը`հավելելով, որ առաջին անգամ Հայաստանում քաղաքական ուժերն ու հասարակական կազմակերպությունները կարողացան միավորվել`քաղբանտարկյալների ու քաղհալածյալների հարցում ընդհանրական մոտեցումներ ձեւավորելով:
Սամվել Աբրահամյանի պատկերացումներով, Հայաստանի Ստրասբուրգյան կոմիտեի գործունեությունն այսպիսին է լինելու. «Ընդդեմ պետական բռնության, մենք պատրաստ ենք ձեւավորել հասարակական պայմանական քաղաքական ատյան: Պետական բռնաճնշումների դեմ կլինի հասարակական կազմակերպված դիմակայությունը»:
Կոմիտեի կազմում քաղաքական կուսակցությունների ղեկավար անձինք չեն լինի, այլ իրավապաշտպան գործունեությամբ զբաղվող գործիչներ: Կոմիտեի կազմը կընտրվի կոնսենսուսային սկզբունքով:
Ըստ բանախոսի, Կոմիտեի ձեւավորումը կնպաստի նաեւ ներկայիս իրավիճակի լիցքաթափմանը`բռնությունների կասեցմանը: Իսկ կոմիտեի անվանումն ընտրվել է ելնելով նրանից, որ Ստրասբուրգը համարվում է մարդու իրավունքների պաշտպանության ու խաղաղության կենտրոն ոչ միայն վերջին տասնամյակներում: Կոմիտեի ուշադրության կենտրոնում կլինեն ոչ միայն քաղբանտարկյալներն ու քաղհալածյալներն, այլ ընդհանրապես մարդու իրավունքների վիճակը Հայաստանում:
Կարդացեք նաև
Հիմնադիր խորհրդարանը ներկայացնող Գարեգին Չուգասզյանն էլ նկատեց, որ այս օրերին ընթացող իրադարձությունները ցույց են տալիս, որ մեր երկրում հալածանքների են ենթարկվում ոչ միայն քաղաքական գործիչները, այլ նաեւ քաղաքացիները, քաղաքացիական ակտիվիստները: «Դեկորատիվ ժողովրդավարությունը ժամանակ առ ժամանակ բացահայտում է իր իրական ոստիկանական դեմքը: Ոչ ոք երաշխավորված չէ բռնություններից: Հայաստանի դատաիրավական վակումը կարող է լրացնել այս փոխարինող կառույցը: Անցումային արդարադատության մարմին կարելի է սա համարել»,- ասաց նա:
Նելլի ԳՐԻԳՈՐՅԱՆ
