«Եթե ավելի հանգիստ պայմաններում քննարկումը չի կայանում, որովհետեւ դիմացի կողմը պատրաստ չէ լսելու փաստարկներ կամ բերել հակափաստարկներ, վստահ չեմ, որ հրապարակային հանդիպումը կարող է լինել արդյունավետ»,- «Առավոտի» հարցին` Դուք, էներգետիկայի նախարարը կամ ոլորտին իրազեկ որեւէ պաշտոնյա չի՞ պատրաստվում այցելել Բաղրամյան պողոտայում ցույց անող ՀՀ քաղաքացիներին, խոսել նրանց հետ` թեկուզ իրավիճակը մեղմելու նկատառումներով, ասաց կառավարության աշխատակազմի ղեկավար Դավիթ Հարությունյանը:
«Նմանատիպ հանդիպումների բազմաթիվ դեպքերի ականատես եմ եղել. նման տեղերում լուրջ քննարկում երբեւէ հնարավոր չէ իրականացնել: Այնտեղ տիրում է հուզական մթնոլորտ, հուզական մթնոլորտում լուրջ քննարկում, բնականաբար, հնարավոր չէ իրականացնել»,- ասաց նա:
