BBC-ի փոխանցմամբ, այսուհետ գերմանացիները էրոտիկ բովանդակությամբ էլեկտրոնային գրքեր կարող են գնել միայն 22:00-ից մինչեւ 06:00-ը: Այս որոշմանը դեմ գնացողներին սպառնում է 50 000 եվրո տուգանք:
Նման սահմանափակում գործում է նաեւ գերմանական կինոթատրոններում, այնտեղ 2002 թվականից մինչ օրս միայն ուշ ժամերի կարելի է դիտել «բաց» տեսարաններով ֆիլմեր: Ինչ վերաբերում է էլեկտրոնային գրականության վաճառքն էլ որոշակի ժամերի իրականացնելուն, դրան մղել են ծնողների բողոքները: Շատերը դժգոհել են, որ անչափահասներին հեշտ հասանելի է սեքսի մասին Schlauchgeluste վերնագրով գրքի ձեռքբերումը: Գերմանական հրատարակիչների ասոցիացիայի փաստաբաններից մեկը՝ Ջեսիկա Զանգերը, էլեկտրոնային գրականության վերաբերյալ խստացված որոշում կայացնելը համարել է ոչ խելամիտ, նշելով, որ դեռահասները հաստատ այլ միջոցներով կարող են տիրանալ իրենց հետաքրքրող բովանդակությանը: Թեման լայնորեն քննարկվել է սոցցանցերում եւ բլոգներում: Գերմանիայում հայտնի բլոգեր Նեյթ Հոֆելդերը կատարվածը որակել է ապուշություն:
Սեփ. լր.
«Առավոտ» օրաթերթ
02.07.2015
