Հարցազրույց ՀՀԿ խորհրդարանական խմբակցության անդամ ԱՐՓԻՆԵ ՀՈՎՀԱՆՆԻՍՅԱՆԻ հետ
-Այս հավաքը ի՞նչ բնույթ ունի. ցուցարարները պնդում են, որ դա ինքնաբուխ եւ խաղաղ է, հետեւաբար իրազեկումը պարտադիր չէ:
-Իրականում, կարծում եմ, գործ ունենք տեւական ժամանակահատվածում իրականացվող հավաքների հետ, քանզի ուսումնասիրելով օրենքով նախատեսված ինքնաբուխ եւ շտապ հավաքի հասկացությունը՝ ակներեւ է դառնում, որ այդ հասկացության ներքո այս հավաքները չեն տեղավորվում: Ուստի, կարծում եմ, պետք է լինի սահմանված կարգով իրազեկում, որից հետո միայն հավաքը կդառնա օրինական:
-Այսինքն՝ Ազատության հրապարակում տեղի ունեցողը օրինական չի համարվի քանի դեռ իրազեկումը ի գիտություն ընդունված չէ՞:
-Իհարկե: Քանի որ չկա իրազեկում լիազոր մարմինը` քաղաքապետարանը, ի գիտություն չի ընդունել այդ իրազեկումը, հետեւաբար օրենքի տեսանկյունից այս հավաքները կհամարվեն ոչ օրինական:
Կարդացեք նաև
Կարծում եմ, որ տվյալ պարագայում ոստիկանությունը ցուցարարներին պարզապես հնարավորություն տվեց քաղաքի բանուկ հատվածն ազատելուց հետո տեղափոխվել նման միջոցառումների անցկացման համար ընդունված մեկ այլ վայր` Ազատության հրապարակ: Բայց այստեղ գտնվելու համար եւս քաղաքացիները պետք է հետեւեն օրենքի տառին, իսկ օրենքը պահանջում է իրազեկում:
-Թերեւս մեր ոստիկանությունը ողջամտություն կդրսեւորի, ժամանակ կտրվի քաղաքացիներին` մինչեւ իրազեկման ի գիտություն ընդունելը անցկացնել խաղաղ ցույցեր:
-Այո, եւ չեմ կարծում, որ ոստիկանությունը կտրուկ գործողությունների կդիմի: Հակառակը, ցուցարարներին ողջամիտ ժամկետներ կտրամադրվեն թղթաբանություն իրականացնելու եւ քաղաքապետարան դիմելու համար: Նաեւ չեմ կարծում, որ ցուցարարները, կազմակերպիչները այս ընթացքում կգնան հակաօրինական կտրուկ քայլերի: Համոզված եմ, որ այս ամբողջ ընթացքը կբերվի օրենքի դաշտ:
Նաեւ ուզում եմ հավելել հետեւյալը. անկախ նրանից, թե այս կամ այն հավաքը ինչ բնույթ ունի, հավաքի կազմակերպչի կամ կազմակերպիչների վրա դրված են որոշակի պարտականություններ, ինչը նրանք պարտավոր են կատարել:
Արմինե ՍԻՄՈՆՅԱՆ
Հարցազրույցն ամբողջությամբ՝ «Հայոց աշխարհ» թերթի այսօրվա համարում