Բորիս Նավասարդյանի կարծիքով՝ արհեստականորեն ծնված լրատվամիջոցները, սովորաբար, չեն կարողանում այն առաքելությունը կատարել, որի համար ստեղծված են
ԱՊՀ, եվրասիական ինտեգրացման և հայրենակիցների հետ կապերի հարցերով Պետդումայի հանձնաժողովի ղեկավար Լեոնիդ Սլուցկին ԵՏՄ երիտասարդ առաջնորդների առաջին համաժողովի ընթացքում հայտարարել է, որ ԵՏՄ երկրներին պետք է միասնական տեղեկատվական հովանոց: Նա հիշեցրել է նաեւ, որ Ղազախստանի նախագահ Նուրսուլթան Նազարբաևն առաջարկել է ստեղծել «Եվրասիա 24» լրատվական ալիքը։
Այս մասին Aravot.am-ը զրուցեց Երեւանի մամուլի ակումբի նախագահ Բորիս Նավասարդյանի հետ: Նրա կարծիքով՝ ԵՏՄ անդամ երկրների միջեւ կապ հաստատելու համար եղած միջոցները բավարար են: Նա համարում է, որ հեռուստաալիքը տեղեկատվական շուկայում լուրջ ազդեցություն չի ունենա:
«Դա վաղուց շահարկվող թեմա է, քանի որ համարվում է, որ Եվրասիական տնտեսական միությունը քարոզչական աջակցության եւ տեղեկատվական աջակցության կարիքն ունի: Եվ այդպիսի մի հեռուստաընկերություն, որն աշխատում է անդամ երկրների համար կարեւոր է համարում: Բայց դա իմ գնահատմամբ՝ խորհրդային ժամանակների գաղափարներ են, քանի որ արհեստականորեն ծնված լրատվամիջոցները, սովորաբար, չեն կարողանում այն առաքելությունը կատարել, որի համար ստեղծված են»,- ասաց նա:
Կարդացեք նաև
Բորիս Նավասարդյանը հեռուստաալիքի ստեղծումը իրատեսական է համարում. «Այսօր պետք է ապացուցել Եվրասիական տնտեսական միության գաղափարախոսներին, որ իրենք լուրջ են տրամադրված միությունը կառուցելու առումով, եւ տարբեր ուղղություններով այդպես ցուցադրական քայլեր են կատարելու համար այդ նախագիծը»:
Ամի ՉԻՉԱԿՅԱՆ
