«Այս պահին չկա ոչ մի տեխնիկական առաջադրանք»,- հուլիսի 13-ին «Հայացք» մամուլի ակումբում լրագրողների հետ հանդիպման ընթացքում, անդրադառնալով հայտարարված աուդիտին, ասաց «Ոչ թալանին» նախաձեռնության համակարգող խմբի անդամ Սոֆյա Հովսեփյանը:
Նա նշեց, որ պարզ չէ, թե ինչ աուդիտ են անում. «Անում են աուդիտ, միջազգային աուդիտ եւ չի մանրամասնվում, թե ինչ աուդիտ է: Եթե ֆինանսական է, ապա 2 տարի չէ, ամեն տարի արել են, եւ վերջին երկու տարիներին հստակ երեւացել է ՀԷՑ-ի վիճակը: Կամ մեզ ի՞նչ ՀԷՑ-ի ծախսերը, սա չի փակելու այն թալանը, որը որ շերտավորված կա մեր ամբողջ երկրում: Ամբողջ խնդիրը հետեւյալն է, որ մենք պետք է հասկանանք, թե ինչպիսի աուդիտ են անում: Չեն բացում, տեղեկություն չեն տալիս, որպեսզի մանիպուլիացիոն կերպով դա էլ անցկացնեն»:
Սոֆյա Հովսեփյանը հավելեց, որ իրենք պահանջել են, որպեսզի իրենց տեղեկացնեն եւ հիմա սպասում են, տեխնիկական առաջադրանքին՝ հասկանալու համար ֆինանսական աուդի՞տ է, թե՞ տեխնիկական. «Մինչեւ օրս չգիտենք, թե երբ է լինելու աուդիտը, այսինքն՝ կան շշուկներ, որ օգոստոս ամսին է լինելու, բայց ոչ մի պաշտոնական, որպես այդպիսին, չկա: Այսինքն՝ փակ համակարգ է ստեղծված, նորից շարունակում են այն կեղտոտ գործելաոճը, որը մինչ օրս իրենք արել են»:
Համակարգող խմբի անդամ Ռիմա Սարգսյանը հավելեց, որ անկախ աուդիտի անցկացվելուց, «Ոչ թալանին» նախաձեռնությունը ուսումնասիրությունները էներգետիկ ոլորտում շարունակելու է: Նա նշեց, որ պատրաստվում են նամակ ուղղել Հանրային ծառայությունները կարգավորող հանձնաժողովի նախագահ Ռոբերտ Նազարյանին:
Կարդացեք նաև
Ամի ՉԻՉԱԿՅԱՆ
