Ադրբեջանի Գյանջայի վերաքննիչ դատարանը ուժի մեջ է թողել այդ երկրում գերի ընկած ԼՂՀ պաշտպանության բանակի նախկին զինծառայող Արսեն Բաղդասարյանի դատավճիռը: Այս մասին հաղորդել է «Trend»-ը:
Հիշեցնենք, որ այս տարվա մայիսի 5-ին Ադրբեջանի Գյանջայի ծանր հանցագործությունների գործերով դատարանը Արսեն Բաղդասարյանին դատապարտել էր 15 տարվա ազատազրկման:
Այսօր Գյանջայի վերաքննիչ դատարանում տեղի է ունեցել Բաղդասարյանի վերաքննիչ բողոքի լսումը: Այն ընթացել է փակ ռեժիմով:
Հիշեցնենք, որ ավելի վաղ ադրբեջանական լրատվամիջոցները հղում անելով այդ երկրի ռազմական գերատեսչությանը՝ հաղորդել էին, թե իբր դեկտեմբերի 26-ին` երեկոյան, ազերիների զինուժը կանխել է Աղդամի ուղղությամբ հայկական հետախուզական խմբի առաջխաղացումը, որի հետեւանքով պրոֆեսիոնալ զինվորական Արսեն Էդուարդի Բաղդասարյանը գերվել է:
Կարդացեք նաև
Ավելի ուշ իր տարածած հաղորդագրություն պաշտպանության բանակը հերքել էր դիվերսիայի մասին լուրը եւ նշել, որ Արսեն Բաղդասարյանը հանդիսանալով ՊԲ պայմանագրային զինծառայող, պարբերաբար ինքնակամ լքել է իր մշտական տեղակայման վայրը, որի համար հրամանատարության որոշմամբ, կարգապահական խախտումներ կատարելու հիմնավորմամբ, ժամանակավորապես հեռացված է եղել ծառայությունից:
Պատրաստեց Աշոտ ԻՍՐԱԵԼՅԱՆԸ
