ՀՔԱ Վանաձորի գրասենյակի ղեկավար Արթուր Սաքունցը «Անդրադարձ» մամուլի ակումբում պատասխանելով լրագրողներից մեկ այն հարցին, թե սահմանադրական բարեփոխումների նոր տեքստում չկա՞ն արդյոք դրական կողմեր, ասաց, որ չի կարելի նման հարցադրում անել այն իրավիճակում, երբ փոփոխության նախաձեռնողը վստահություն չունի:
«Այսինքն` հիմա դուրս է գալիս, որ իրենք նույնիսկ ամենալավ փոփոխություններն առաջարկեն, մենք «ոչ» ենք ասելու: Այո: Պետք է ասենք, ոչ, որովհետեւ իրենք այսօրվա գործող Սահմանադրության հիմնարար սկզբունքները ոտնահարել են եւ չենք կարող իրենց վստահել»,- մասնավորապես ասաց իրավապաշտպանը:
Պարոն Սաքունցը հայտարարեց, որ պետք է ստուգվի Հայաստանի Հանրապետական Կուսակցության օրինականության հարցը. «Վայոց ձորի մարզպետարանը վճարում է ՀՀԿ-ի վարձակալած տարածքի համար: Եղեգնաձորի հարկային տեսչությունը նույնպես վճարում է այդ տարածքների համար: Դա աբսուրդ է»:
Ըստ Արթուր Սաքունցի, եթե «սահմանադրության փոփոխությունների մասին խոսում է Լիսկան (Սուրիկ Խաչատրյան-Ա.Ի.) դա արդեն ցուցանիշ է ինձ համար: Դա շատ ունիկալ է: Լիսկան խոսում է եւ ասում է, որ շատ անհրաժեշտ են սահմանադրական բարեփոխումները: Ինձ որեւիցե բացատրություն պետք չէ: Ես ասում եմ, որ Լիսկան հանդիսանում է սահմանադրական փոփոխությունների ցուցանիշը»:
Կարդացեք նաև
Աշոտ ԻՍՐԱԵԼՅԱՆ
