Կենտրոն եւ Նորք-Մարաշ վարչական շրջանների ընդհանուր իրավասության դատարանում դատավոր Երջանիկ Մակյանի նախագահությամբ հուլիսի 22-ին շարունակվում էր քննվել Կարեն Սաղաթելյանն ընդդեմ Նարեկ Հակոբյանի գործի քննությունը:
Դատական նիստի ընթացքում մեղադրող Ռոլանդ Հայրապետյանը հանդես եկավ մեղադրական ճառով: Ըստ մեղադրողի՝ հիմնավորված է, որ Նարեկ Հակոբյանը 2014 թվականի հունիսի 23-ին մասնակցել է Հանրային ծառայությունները կարգավորող հանձնաժողովի դիմաց էլեկտրաէներգիայի սակագնի բարձրացմանն ուղղված բողոքի ակցիային, եւ նրա ընթացքում փորձել է խոչընդոտել իշխանության ներկայացուցիչ հանդիսացող ոստիկանության աշխատակիցների գործողություններին եւ բռնություն է գործադրել գործով ոստիկանության Երևան քաղաքի վարչության ՊՊԾ գնդի երրորդ հատուկ գումարտակի ծառայող, ոստիկանության սերժանտ, տուժող Կարեն Սաղաթելյանի նկատմամբ:
Ռոլանդ Հայրապետյանի խոսքերով՝ անարժանահավատ են վկաների ցուցմունքները, քանի որ նրանք շահագրգիռ անձինք են. «Չնայած այդ հանգամանքին՝ հարկ եմ համարում նշել, որ նրանք նշել են, թե չեն տեսել, որ Հակոբյանը հարվածած լինի ոստիկանության աշխատակցին, սակայն միեւնույն ժամանակ՝ չեն պնդել, որ նման բան չի եղել»:
Կարդացեք նաև
Մեղադրողը միջնորդեց Նարեկ Հակոբյանին մեղավոր ճանաչել եւ նրա նկատմամբ նշանակել պատիժ՝ ազատազրկում, 6 ամիս ժամկետով. «Պատիժը նշանակելիս հարկավոր է հաշվի առնել ամբաստանյալի կատարած արարքի հանրային վտանգավորության աստիճանը եւ բնույթը, վերջինիս անձը բնութագրող տվյալները, ինչպես նաեւ պատիժը մեղմացնող եւ ծանրացնող հանգամանքները: Ամբաստանյալի անձը բնութագրող տվյալները նրանք են, որ վերջինս դատված չի եղել, բնութագրվում է դրական, ունի բարձրագույն կրթություն եւ համարվում է գիտաշխատող: Ամբաստանյալի պատիժը մեղմացնող կամ ծանրացնող հանգամանքները բացակայում են»:
Պաշտպանական կողմը դատարանից ժամանակ խնդրեց՝ ճառին պատրաստվելու համար: Դատական նիստը հետաձգվեց, հաջորդ դատական նիստը տեղի կունենա օգոստոսի 5-ին:
Ամի ՉԻՉԱԿՅԱՆ
