Երիցուկը ոչ միայն ունի գեղեցիկ եւ հաճելի ծաղիկներ, այլեւ օժտված է մի շարք օգտակար հատկություններով, որով էլ հայտնի է բժշկության մեջ:
Բույսը պարունակում է սալիցիլաթթու, ասկորբինաթթու, դառնահամ նյութեր, ֆիտոստերին, դաբաղանյութեր, եթերայուղ, որի կազմում կան մոտ 40 տարբեր տարրեր եւ այլն: Բույսը պարունակում է մակրո եւ միկրոտարրեր:
Ծաղիկների թուրմը բժշկության մեջ օգտագործվում է որպես բուժող միջոց՝ ստամոքսաաղիքային տրակտի հիվանդությունների, լյարդի եւ լեղուղիների, ստամոքսի կծկումների՝ սպազմի ժամանակ: Հոգնաների ձեւով օգտագործվում է կոլիտների եւ թութքի ժամանակ: Ողողումների ձեւով՝ լնդերի, բերանի խոռոչի լորձաթաղանթի բորբոքումների, անգինաների դեպքում: Թրջոցների ձեւով օգտագործում են էկզեմայի, խոցերի, թարախաբշտերի, ռենտգենյան ճառագայթներից այրվածքների ժամանակ: Տաք թրջոցները՝ ռեւմատիզմի, պոդագրայի, արտրիտների եւ վնասվածքների դեպքում: Ամբողջ մարմնի մկանային ցավերի ժամանակ խորհուրդ է տրվում երիցուկը աղալ, ավելացնել նշի յուղ եւ մեղր, լավ շաղախել եւ քսել համապատասխան հատվածներին:
Երիցուկի ձեթը օրը 2 անգամ 1 թեյի գդալ խմել որովայնի ցավերի, լյարդի բորբոքումների, ուռուցքների, նյարդային համակարգի բորբոքումների եւ արցունքահոսության բուժման համար:
Երիցուկը գինու քացախով եւ ջրով եփել՝ ցավոտ աչքեը կամ ականջը պահել այդ գոլորշու վրա:
2 կիլոգրամ երիցուկը աղալ, ավելացնել 4 լիտր եռացրած ջուր եւ լոգանք ընդունել միզաքարային հիվանդությունները բուժելու համար:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
22.07.2015
