Ռուս գործարար Գերման Ստերլիգովի կինը՝ Ալյոնան, երեխաների հետ վերադարձել է Ռուսաստան մասնակցելու իր փեսայի՝ Օլեգ Սիրոտայի պանրի գործարանի բացմանը: Նա «Комсомольская правда»-ի հետ զրույցում նշել է, որ Գերման Ստերլիգովը մնացել է Լեռնային Ղարաբաղում:
«Մենք ցանկանում էինք բոլորս միասին գալ ու մասնակցել մեր փեսայի՝ Օլեգ Սիրոտայի պանրի գործարանի բացմանը, բայց Ադրբեջանի կողմից Գերմանի նկատմամբ «Ինտերպոլի» միջոցով հետախուզում հայտարարելուց հետո նա չկարողացավ վերադառնալ: Հայ սահմանապահները նախազգուշացրել են, որ Գերմանին կարող են սահմանը հատելիս ձերբակալել»,- մասնավորապես ասել է Ալյոնան:
Գործարարի կնոջ խոսքերով՝ նրանք Լեռնային Ղարաբաղ կվերադառնան օգոստոսի 29-ին: Այդ օրը նախատեսված է մոդելային ցուցադրություն. «Այնտեղ 6 մարդ օգնում է ինձ, կարում են զգեստներ»:
Ալյոնա Ստերլիգովան նաեւ տեղեկացրել է, որ եթե ամուսինը չկարողանա գնալ Ռուսաստան, ապա ինքն ու երեխաները կմնան Լեռնային Ղարաբաղում:
Կարդացեք նաև
Մանրամասները՝ տեսանյութում
Հավելենք, որ Մաքս Գորկի անունով մի օգտատեր էլեկտրոնային փոստով Aravot.am-ին տեղեկացրել է, որ չնայած Ադրբեջանի հայտարարություններին, թե Ստերլիգովի նկատմամբ Ինտերպոլի միջոցով հետախուզում են հայտարարել, իրականում կազմակերպության կայքէջում տեղադրված Ռուսաստանի հետախուզման մեջ գտնվող քաղաքացիների ցանկում նրա անունը չկա:
Պատրաստեց Աշոտ ԻՍՐԱԵԼՅԱՆԸ
