Մի քանի օր առաջ Սահմանադրական դատարանի անդամ Ֆելիքս Թոխյանը հայտարարել էր, որ սահմանադրական հանրաքվեն ամենայն հավանականությամբ կանցկացվի նոյեմբեր ամսին, իսկ օգոստոսի վերջին օրերին, նախագիծն արդեն կուղարկվի ԱԺ: Այսօր «Փաստարկ» ակումբում պատասխանելով Aravot.am-ի հարցին`իբրեւ իշխող քաղաքական ուժի ներկայացուցիչ ինքը կարո՞ղ է ավելի հստակ խոսել սահմանադրական բարեփոխումների գործընթացի ժամկետների մասին, ՀՀԿ-ում նման քննարկումներ եղե՞լ են`ՀՀԿ ԳՄ անդամ Գագիկ Մինասյանն ասաց. «Տեղյակ եմ այնքան, որքան դուք ասացիք»:
Իշխող քաղաքական ուժի ներկայացուցիչը սահմանադրական բարեփոխումների նախագծում կարեւոր է համարում նաեւ ազգային փոքրամասնությունների խորհրդարանում ներկայացված լինելու հնարավորությունը: «Դրանով կմեծացնենք համախմբվածությունը մեր պետության շուրջ»,- ասաց Գագիկ Մինասյանը:
Aravot.am-ի հարցին`նախագծով սահմանվում է մեծամասնական ընտրական համակարգի վերացում, ու ստացվում է, որ ազգային փոքրամասնությունների ներկայացուցիչները պետք է պարտադիր ընդգրկված լինեն որեւէ քաղաքական ուժի կազմում: Ի դեպ, այդ առիթով մամուլում իր տարակուսանքն էր հայտնել եզդիական համայնքի ներկայացուցիչ Բորիս Մուրազին, իշխող ուժի ներկայացուցիչը պատասխանեց. «Պետք է մի քիչ սպասենք, նախագիծը եթե ընդունվի, ԸՕ-ում հստակություններ կլինեն»: Հստակեցնող հարցին`բացառություններ կարվե՞ն, ՀՀԿ-ական պատգամավորը հորդորեց համբերություն ունենալ:
Նելլի ԳՐԻԳՈՐՅԱՆ
