Անցած տարի շուքով կայացավ Քաշաթաղի երկրորդ քաղաք Կովսականի մանկապարտեզի բացումը, որին ներկա էր նաև ԼՂՀ նախագահը: Համապատասխան գույքով կահավորված և օժանդակ կառույցներով ապահովված նախադպրոցական կրթօջախում այժմ գործում է 2 խումբ՝ ընդհանուր 46 սաներով:
Վերջերս եղա Կովսականում և «Քաշաթաղի հանրակրթական հաստատությունների տնօրենություն» ՊՈԱԿ-ի տնօրեն Հովհաննես Սահակյանի, շրջվարչակազմի աշխատակազմի իրավաբան Արթուր Առաքելյանի հետ այցելեցի մանկապարտեզ:
Լարիսա Ավետյանը մոտ մեկ ամիս է, ինչ տնօրինում է նախակրթարանը: Տեղեկացրեց, որ ունեն ընդհանուր 12 աշխատող, որից 2 դաստիարակ, 2 դայակ: Մանկապարտեզում կա բուժկետ, սակայն բուժքրոջ հաստիք կհատկացվի 2016թ. հունվարից: Նշեց, որ մանկապարտեզ են հաճախում նաև երեխաներ հարևան Վանի, Ալաշկերտի և Մուշի գյուղական համայնքներից:
Այս տարի 6 սան հրաժեշտ տվեցին մանկապարտեզին և սեպտեմբերից կդառնան դպրոցական: Խմբերում զրուցեցի փոքրիկների հետ: Մինչև 4 տարեկանների խմբում (դաստիարակ՝ Գրետա Ռոստոմյան) մանուկները գնդակով խաղում էին, ուրախությամբ լուսանկարվեցին, փորձեցին երգել օրվա սովորածը:
Մինչև 6 տարեկանների խումբն ավելի մարդաշատ էր: Դաստիարակ Լիա Հայրապետյանի սաները մեծ ոգևորությամբ արտասանեցին նոր սովորած ոտանավորը: Բոլոր տղաներն էլ ասացին, որ մեծանան՝ զինվոր են դառնալու և կպաշտպանեն հայրենիքը: Հարություն Վարդանյանը, որն այս տարի դպրոց է հաճախելու, արտասանեց Այբուբենին նվիրված ոտանավոր:
Էրիկ Հովհաննիսյանի որոշումը մեկն է՝ դառնալու է գեներալ, որ հրամայի իր զորքին՝ հաղթեն թշնամուն: Ալենն էլ է հրաժեշտ տալու մանկապարտեզին և ընդունվելու է դպրոց: Որոշել է անելիքը՝ դպրոցն ավարտելուց հետո դառնալու է զինվոր, հետո՝ ոստիկան:
Աղջիկներից Հասմիկի երազանքն է բժիշկ դառնալ, Լիլիթինը՝ ուսուցչուհի: Իսկ կապուտաչյա Միլենան ասաց, որ մեծանա, հարսիկ է դառնալու:
Փոքրիկները պատմում են իրենց մասին, նկարագրում իրենց բնակավայրերը, այգիները, պահած կենդանիները: Հետաքրքրվում են՝ ինչի համար եմ լուսանկարում: Ուրախանում, որ իրենց լուսանկարները կտպագրվեն թերթում:
Հրաժեշտ եմ տալիս մեր պայծառ ու հրաշք երեխաներին՝ հավատով, որ նրանց բարի նպատակները կիրականանան:
Զ. Ըռքոյան
