Ռուբեն Բալոյանը` Վարդան Պետրոսյանի պատժի մասին
Այսօր փաստաբան Ռուբեն Բալոյանը «Բլից ինֆո» ակումբում ասաց, որ ապատեղեկատվություն է տարածվել, իբրեւ դերասան Վարդան Պետրոսյանը ազատության մեջ է: Բալոյանի խոսքերով՝ նման տեղեկատվությունը տուժող կողմի համար ցավալի է, ուղղակի եւ անուղղակի ազդում է նրանց վրա:
Հիշեցենք, որ լրատվամիջոցներով տեղեկություններ էին տարածվել, որ Վարդան Պետրոսյանն արդեն ազատության մեջ է:
Բալոյանն ասաց, որ Վարդան Պետրոսյանը պատիժը կրելու է բաց ռեժիմով, եւ սա որոշում է քրեակատարողական հիմնարկի ղեկավարությունը, այս դեպքում՝ Վարդաշեն ՔԿՀ-ն: Մինչդեռ լրատվամիջոցներով, ինչպես ասաց Բալոյանը, տեղեկություններ են տարածել, իբր դատարանն է վճռել, որ Պետրոսյանը բաց ռեժիմով է պատիժը կրելու:
Կարդացեք նաև
Փաստաբանը վստահեցրեց, որ ինքը միշտ էլ կողմնակից է եղել հաշտությանը, մինչդեռ, ըստ նրա, Վարդան Պետրոսյանի դատապաշտպան Նիկոլայ Բաղդասարյանը հայտարարում է, թե ինքն է մեղավոր, որ հաշտության չեն գնում: Բալոյանն ասաց, որ Նիկոլայ Բաղդասարյանը հայտարարել է, թե Բալոյանը հաշտության գալու առաջարկ է ներկայացրել, պայմանով, որ Վարդան Պետրոսյանը հայտարարի, որ հարբած է եղել. «Նման առաջարկը ես համարում եմ անբարոյական: Դա մոտեցում չի: Սա է եղել պատճառը, որ կողմերի մեջ հաշտություն տեղի չի ունեցել: Սակայն ես կարծում եմ, որ Վարդան Պետրոսյանը փաստացի ընդունել է իր մեղքը, եւ նրա մեղքը ապացուցված է, քանի որ նրանք չեն դիմել Վերաքննիչ դատարան: Եթե հաշտության եկած լինեինք, դերասանը դեռ նախորդ ամառ կլիներ ազատության մեջ»:
Հիշեցնենք, որ Կոտայքի մարզի ընդհանուր իրավասության առաջին ատյանի դատարանի հունվարի 29-ի վճռով Վարդան Պետրոսյանը մեղավոր է ճանաչվել ՀՀ քրեական օրենսգրքի 242-րդ հոդվածի 3-րդ մասով (Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ) նախատեսված հանցագործության կատարման մեջ: Նրա նկատմամբ պատիժ է նշանակվել՝ ազատազրկում 5 տարի ժամկետով` տրանսպորտային միջոցներ վարելու իրավունքից զրկելով` 2 տարի ժամկետով:
Հիշեցնենք, որ դերասան Վարդան Պետրոսյանը աշխատանքի հրավեր է ստացել թատրոններից մեկի ղեկավարի կողմից:
Նելլի ԲԱԲԱՅԱՆ
