Հայաստանում Գերմանիայի դեսպան Մաթիաս Քիսլերն այսօր անդրադարձել է Հայաստանում Սահմանադրական փոփոխությունների նախաձեռնությանը:
«Նոր Սահմանադրության նախագիծը ընդդիմությանը տալիս է լայն հնարավորություններ, մի քիչ մոռացված է այն փաստը, որ սա մի նախագիծ է, որի մեջ շատ լայն կերպով ընտրված են հիմնարար բոլոր իրավունքները»,- Հայաստանի զարգացումը կախվա՞ծ է սահմանադրական փոփոխություններից հարցին պատասխանեց դեսպանը:
Նրա խոսքով, ժողովրդի ու տվյալ պետության որոշելիք հարցն է, թե երկրում ինչպիսի կառավարման համակարգ են ուզում ունենալ. «Նույնիսկ Եվրամիության ներսում տարբեր պետություններ ունեն տարբեր կառավարման համակարգեր, ֆրանսիացիները որոշել են, որ պետք է ունենան նախագահական կառավարման համակարգ ու գոհ են այդ համակարգից, Գերմանիան որդեգրել է ուժեղ խորհրդարանական կառավարման համակարգ՝ հաշվի առնելով նաեւ իր պատմական փորձառությունը, ուստի իդեալական կառավարման համակարգ գոյություն չունի»:
Նա նաեւ ասաց, որ ինչպիսի կառավարման համակարգ էլ որոշվի, կարեւորը, որ հանրության լայն համախոհության հարցում որոշում կայացվի. «Հայաստանում սահմանադրական փոփոխությունների մասին քաղաքացիների իրազեկման մակարդակը բարձրացնելու, քաղաքացիական հասարակությանն այս գործընթացում ներգրավելու ուղղությամբ քայլեր են արվում»:
Կարդացեք նաև
Արփինե ՍԻՄՈՆՅԱՆ
