Կառավարությունը մի նախագծով պատգամավորների աջակցությունն է խնդրում, որ ավելացնի դատավորների թիվը, քանի որ շատ ծանրաբեռնված են, գործերը շատ են, մյուս օրինագծով այնպիսի առաջարկ է անում, որը, ըստ պատգամավորների, ավելացնելու է գործերի քանակը դատարանում 1/3-րդով:
Խոսքը Քաղաքացիական օրենսգրքում փոփոխությունների փաթեթի մասին է, որը, կառավարության ներկայացուցչի՝ ԿԲ փոխնախագահ Ներսես Երիցյանի համոզմամբ, կարգավորելու է գրավադրման հետ կապված խնդիրները:
Նախագծով առաջարկվում է, որ եթե գրավադրված գույքը դիտավորությամբ վնասվում է, օրինակ, մեքենան գրավ է դրել եւ այն վնասվում է, ապա քրեական պատասխանատվության պետք է ենթարկվի գրավատուն:
Ինչպես տեղեկացրել ենք, նախագծին դեմ արտահայտվեցին Հեղինե Բիշարյանը, Գագիկ Ջհանգիրյանը, Արծվիկ Մինասյանը:
Կարդացեք նաև
ՕԵԿ պատգամավոր Հովհաննես Մարգարյանն էլ տարավ-բերեց ու ասաց. «Էս օրենքը որ ընդունենք՝ մեր քաղաքացիների 90 տոկոսը պետք է ընկնի դատական քաշքշուկների մեջ: Տասնյակ դատավորներ պիտի ավելացնենք դատական համակարգում, իսկ մենք գիտենք, թե մի դատավորն ինչքան է արժենում մեր պետական բյուջեի վրա: Դուք լավատես եք, ես լավատես չեմ, ժողովրդական խոսք կա՝ ասում են՝ տարած-ետ բերած կնիկ մարդն ում է պետք, որ տարած-ետ բերած օրենքը բանի պետք լինի»:
ԱԺ փոխնախագահ Հերմինե Նաղդալյանը, որը վարում էր նիստը, արձագանքեց. «Այսպիսի անվանարկում մենք դեռ չէինք լսել:
Էդմոն Մարուքյանի դիտարկմամբ՝ պետք չի մարդկանց քրեական հետապնդման զոհ դարձնել. «Արդեն ինչքան ժամանակ է, փորձ է արվում քրեականացնելով՝ ինչ-որ խնդիրներ լուծել, այնպիսի խնդիրներ, որոնք քրեական դատավարության ոլորտի լուծման խնդիրը չեն:
Ըստ ՀՀԿ պատգամավոր Արտակ Դավթյանի, կառավարության այս նախագիծը դատարկ տեղում չի ծնվել: Ինչ առաջարկում է ԿԲ-ն այսօր, տարիների քննարկման արդյունքն է: Եթե ուզում ենք տոկոսադրույքների իջեցում, որտեղի՞ց պետք է դա լինի:
ՀՀԿ պատգամավոր Հովհաննես Սահակյանի խոսքերով՝ քրեաիրավական հարթությունում լուծում տալ քաղաքացիաիրավական հարաբերությունների խնդիրների, այստեղ իսկապես խնդիր կա:
Հռիփսիմե ՋԵԲԵՋՅԱՆ
