Դեկտեմբերի 31-ի գիշերը Հայ առաքելական եկեղեցիներում կկատարվի Հանրապետական մաղթանք, որի ընթացքում հոգևորականների առաջնորդությամբ հավատացյալները կաղոթեն երկրի խաղաղության համար: Այս մասին այսօր «Հենարան» ակումբում լրագրողներին ասաց Նոր Նորքի Սուրբ Աստվածածին եկեղեցու հոգեւոր հովիվ Տեր Նշան քահանա Ալավերդյանը:
«Տարեմուտի գիշերն արդեն երկրորդ անգամ Հայրապետական կոնդակով կկատարվի նռան օրհնության կարգ, որը խորհրդանշում է եկեղեցին եւ Քրիստոսի արյամբ փրկված հավատացյալներին: Եկեղեցին Քրիստոսին հավատացողների մեծ միությունն է: Տարին պետք է աղոթքով սկսել»,-ասաց բանախոսը: Նա տեղեկացրեց, որ այսօրվանից սկսվում է Սուրբ Ծննդյան պահքը եւ տեւում մինչեւ հունվարի 5-ի երեկոն. «Մեր եկեղեցու հայրերն այս շրջանը նշում էին Սուրբ ծննդյանը պատրաստվելով: Այս շրջանի անդրադարձն է նաեւ այն, որ մինչ օրս պահպանվել են պահոց կերակրատեսակները՝ պասուց տոլմա, չրեր եւ այլն: Պահեցողության նպատակը մեկն է՝ միտքը բեւեռել Սուրբ ծննդի վրա, ապրել նորոգման ընկալումով»:
Տեր Նշանը նկատեց, որ սովետական մշակույթի ուժով՝ շատերի համար հրաշագործ է համարվում տարեմուտի գիշերը, այնինչ հրաշքներով լի գիշերը Սուրբ ծննդի գիշերն է. «Հայաստանում կան խմբեր եւ կազմակերպություններ, որոնք դեկտեմբերի 25-ին են փորձում Սուրբ Ծնունդը նշել, այնինչ հայտնի է, որ մինչեւ 4-րդ դարը այն նշվել է հունվարի 6-ին: Իսկ 5-րդ դարում Հռոմում ներդրվեց արեւի աստծո տոնը՝ ստվերելու համար իրական արեգակի՝ Քրիստոսի ծնունդը: Սուրբ Ծննդյան ավետիսը տրվում է հունվարի 5-ի երեկոյան, քանի որ եկեղեցական օրը փոխվում է երեկոյան ժամերգությունից հետո»: Հոգեւորականը նաեւ նշեց, որ տարեցտարի ավելանում է Նոր տարին եկեղեցում դիմավորողների թիվը:
Հավելենք, որ Ամանորի գիշերը Արարատյան Հայրապետական թեմի բոլոր եկեղեցիները բաց են լինելու: Հունվարի 1-ին` ժամը 10:30-ին, կմատուցվի Ս. Պատարագ: Հունվարի 5-ին` ժամը 17:00-ին, կմատուցվի Ս. Ծննդյան Ճրագալույցի Ս.Պատարագ, իսկ հաջորդ օրը՝ ժամը 11:00-ին Ս. Ծննդյան տոնական Ս. Պատարագ: Հունվարի 7-ը Մեռելոց է: ժամը 10:30-ին կմատուցվի Ս. Պատարագ` ի հիշատակ ննջեցյալների:
Կարդացեք նաև
Լուիզա ՍՈՒՔԻԱՍՅԱՆ
