«Ժամանակին Հայոց ցեղասպանությունը չի դատապարտվել: Սա կարեւոր փաստ է, այդ պատճառով էլ Հիտլերն ասաց իր հայտնի խոսքերը: Բայց առաջինը ոչ պետական մակարդակով Հայոց ցեղասպանությունը ճանաչել են հրեաները՝ 1915 թվականին»,-այսօր «Նոյան Տապան» լրատվական գործակալության մամուլի սրահում ասաց փիլիսոփայական գիտությունների դոկտոր Վիլ Պողոսյանը:
Հիշեցնենք, որ այսօր Հոլոքոստի զոհերի հիշատակի օրն է:
Պողոսյանը հիշատակեց հրեա հայտնի լրտես Սառա Աարոնսոնին, որն ասել է՝ «մեր արյունը հայերի արյունն է». «Նա առաջինն է հոդվածներ տպագրել Հայոց ցեղասպանության մասին, նշել, որ հայերին ոչ միայն քշել են Դեյր Զորի անապատ, այլեւ կենդանի այրել եկեղեցիներում»:
Միաժամանակ, փիլիսոփան ասաց, որ հրեաները Հայոց ցեղասպանությունը ցածր են դասում Հոլոքոստից. «Հիմա մենք պետք է ցույց տանք, որ հայերը եւ հրեաները եղբայրներ էին: Դա ասել է Աարոնսոնը: Մենք պետք է ցույց տանք, որ ցեղասպանությունը տեսական կողմ ունի, որը պետք է բացահայտել: Օրինակ՝ մեզնից շատերն ասում են, որ Հայաստանում եղել է տեղահանում եւ ցեղասպանություն: Այնինչ դրանք նույն բանն են: Դա եղել է սպանություն»:
Կարդացեք նաև
Վիլ Պողոսյանը համոզված է, որ Հայաստանը տանուլ է տվել ցեղասպանության 100-ամյակը. «Չորս նախագահների այցը ծիծաղելի էր: Թուրքը 74-ին էր «հավաքել»: Սա մեր մեղքով եղավ: Մեր դիվանագիտությունը քնած է»:
Լուիզա ՍՈՒՔԻԱՍՅԱՆ
