Այսօր «Հայելի» ակումբում տնտեսագետ Վարդան Բոստանջյանը եւ հանրապետական պատգամավոր, Ազգային ժողովի տնտեսական հարցերի մշտական հանձնաժողովի նախագահ Վարդան Այվազյանն անդրադառնալով Իրանի նկատմամբ պատժամիջոցների վերացմանը, ասացին, որ Հայաստանը կարող է Իրանի համար ճանապարհ լինել Եվրասիական տնտեսական միության շուկայի համար:
Վարդան Այվազյանը նկատեց, որ Իրանի նավթային պաշարները մի քանի անգամ գերազանցում են Ռուսաստանի պաշարներին: Վարդան Այվազյանի ներկայացմամբ՝ Իրանը կարող է Հայաստանում արտադրություն ծավալել եւ արտահանել Ռուսաստան:
Այվազյանի խոսքերով՝ Ռուսաստանի հետ գազային պայմանագիրը չի սահմանափակում Իրանից գազ ներկրելը: Նա ասաց, որ եթե կա մեկը, որ Ռուսաստանից ավելի էժան գազ կառաջարկի՝ մենք պատրաստ ենք: Վարդան Այվազյանը վստահեցրեց, որ երբեւէ չի եղել ասեն՝ 160 դոլարից էժան գազ ենք տալիս, եկեք գնեք:
Aravot.am-ի այն դիտարկմանը, որ իրանական կողմը դեսպանի մակարդակով հայտարարել է, որ պատրաստ է Հայաստանին գազ մատակարարել, Այվազյանն ասաց՝ մի անգամ առաջարկ եղել է: Aravot.am-ի հարցին՝ այդ մի անգամը բավարար չէ՞ր, որպեսզի ՀՀ կառավարությունը բանակցի Իրանի հետ, Այվազյանը վրդովվեց. «Նորից եմ կրկնում՝ ոչ մեկ չի ասել, հայտարարություն չի եղել՝ եկեք, մենք ձեզ էժան գազ ենք առաջարկում»:
Կարդացեք նաև
Ապա պրն Այվազյանը դիմելով Բոստանջյանին, ասաց՝ «խի,կասկածո՞ւմ ես, որ ասեն 160 դոլարից էժան գազ ենք տալիս, մենք չընդունենք: Ինքը միշտ հայտարարում է՝ պատրաստ ենք գազ մատակարարել»: Ի պատասխան Այվազյանի՝ Բոստանջյանն ասաց. «Մի կռուշկա նավթի, գազի համար գալու ա ընկնի մեր ոտե՞րը»:
Ապա Այվազյանն անդրադառնալով Aravot.am-ի այն դիտարկմանը, որ ինչո՞ւ է Հայաստանը միայն Ռուսաստանից բենզին ներկրում, Այվազյանն ասաց. «Էդ հարցը գնացեք գործադիրին տվեք, թե ինչու են շաքարավազը, բանանը, բենզինը մի հոգի ներկրում»: Aravot.am-ին հարցին՝ Դուք իշխանության ներկայացուցիչ եք, հանրապետական պատգամավոր, ինչո՞ւ ձեզ չդիմեմ, պատգամավոր լինելը ազատո՞ւմ է այդ կարգի պատասխանատվությունից, Այվազյանն ասաց. «Գնացեք, հարցրեք նրանց, ովքեր դրանք ներկրում են: Էներգետիկայի նախարարին էլ կանչեք, հարցրեք գազի մասին»:
Մանրամասն՝ տեսանյութում
Նելլի ԲԱԲԱՅԱՆ
