Էրեբունի եւ Նուբարաշեն վարչական շրջանների ընդհանուր իրավասության առաջին ատյանի դատարանում փետրվարի 4-ին դատավոր Վլադիմիր Գրիգորյանի նախագահությամբ այսօր շարունակվում էր «Օֆշորի գործի» քննությունը:
Դատական նիստի ընթացքում ամբաստանյալ Աշոտ Սուքիասյանի ներկայացուցիչ Յուրիկ Խաչատրյանը շարունակում էր ապացույցներ հրապարակել: Ըստ նրա այդ ապացույցներից պարզ է, որ Աշոտ Սուքիասյանը նպատակ չի ունեցել խարդախություն կատարել:
Մեղադրողը հայտարարեց, որ կարելի էր ժամանակ չծախսել եւ հրապարակել այդ փաստերը, քանի որ դրանք մեղադրանքի հետ ոչ մի առնչություն չունեն:
«Հարգելի մեղադրողին կհորդորեի, թե պաշտպանական կողմը ինչ տակտիկա է, ինչ դիրքորոշում է ընդունում, քանի որ դա բացառիկ իրավասություն է»,- ասաց Յուրիկ Խաչատրյանը:
Կարդացեք նաև
Փայլակ Հայրապետյանի ներկայացուցիչ Շալիկո Փիրուզյանը հայտարարեց, որ լիազորագրերը նպատակային են տրվել, ոչ թե նվիրատվություն են եղել. «Փայլակ Հայրապետյանը Աշոտ Սուքիասյանին չի ճանաչել, Վարդան Հայրապետյանը չի ճանաչել Աշոտ Սուքիասյանին, որպես ինչ պետք է 100 միլիոնանոց գույքը նվիրեին Աշոտին, տային Աշոտին: Այսինքն՝ նպատակ է եղել, նպատակն էլ այն է եղել, որ այսօր Աշոտ Սուքիասյանը նստած է ամբաստանյալի աթոռին խարդախության համար, որ խարդախություն է գործել, խարդախությամբ այս ամեն ինչն արել է, հետեւաբար՝ այսօր ամբաստանյալ է համարվում»:
Աշոտ Սուքիասյանը հայտարարեց, որ Փայլակ Հայրապետյանը սուտ է խոսում. «Ես էկոնոմիկայի նախարարության ժողովին գնացել եմ որպես առաջատար մասնագետ, ինձ հրավիրել էին, որպեսզի ոտքի կանգնացնեմ ադամանդագործությունը, ես մտադրություն չունեի այդ ժողովին գնալու: Հայրապետյանն է եկել այնտեղ որս անելու. ինքը նպատակ ուներ իր պարտքերը փակեր, հետո էլ բիզնեսը խլեր, Աֆրիկայում էր հայտարարեր, որ ես Հայաստանում ցանկացած մարդու գլուխը կկտրեմ, կվերացնեմ»:
Ամի ՉԻՉԱԿՅԱՆ
