Արդարադատության նախարարության «Աբովյան» քրեակատարողական հիմնարկի կալանավոր Սերվենիկ Գեւորգյանը երկու օր է հացադուլի մեջ է: Այս մասին քիչ առաջ Aravot.am-ին ասաց նրա պաշտպանը՝ ՀՀ փաստաբանների պալատի անդամ Գայանե Գրիգորյանը (լուսանկարում):
Պաշտպանը փորձել է նրան տեսակցել, պատկերն այսպիսին էր. «Կին կալանավորներն էին իջեցնում սայլակով: Տղամարդիկ էլ չէին բռնել: Ձախ կողմը պարալիզացված կնոջը իջեցրել են աստիճաններով: Կնոջ վիճակն ավելի վատացավ: Նա պետք է միշտ պառկած վիճակում լինի»,- ասում է Գայանե Գրիգորյանը, կատարվածը համարելով խոշտանգում իր պաշտպանյալի նկատմամբ:
«Անձը բառիս բուն իմաստով խոշտանգվում է, անմարդկային դաժան վերաբերմունքի է արժանանանում, այն դեպքում, երբ նրա սեռը գոնե կարող են հաշվի առնելով, առաջնային բուժօգնությունը ցույց տան»,- ասում է պաշտպանը:
Գ.Գրիգորյանն ուշադրություն է դարձնում քրեակատարողական հիմնարկի բուժանձնակազմի ու առողջապահության նախարարության բուժսպասարկման վրա.«Խցում թողել են կալանավորին, բախտի քմահաճույքին»:
Կարդացեք նաև
Պաշտպանը դիմել է ՀՀ նախագահին, առողջապահության նախարարին, արդարադատության նախարարին, ՄԻՊ-ին:
Նշենք,որ կալանավորն իր գիտակցությունը կորցրել էր հունվարի 23-ին:Երբ ուշքի է եկել, զգացել է, որ ձախ ձեռքը, ոտքը անշարժացել են, չի կարողանում խոսել:
Նրան տեղափոխել են Աբովյան քաղաքի բժշկական կենտրոն, իրականացրել կոմպյուտերային տոմոգրաֆիա: Ըստ պաշտպանի, նրան տեղափոխել են «Գրիգոր Լուսավորիչ» բժշկական կենտրոնի վերակենդանացման բաժին, ապա՝ հիվանդասենյակ:
Կալանավորը չի կարողանում շարժվել, ինքնուրույն նստել:
Որպեսզի խցակիցներին նեղություն չտա, նա չի ուտում, չի սնվում:
Մինչդեռ նրան անհրաժեշտ է մշտական խնամք, դեղորայք:
Ի դեպ, «Գրիգոր Լուսավորիչ« բժշկական կենտրոնում Սերվենիկ Գեւորգյանի հարազատները հորդորել էին անձնակազմին, դուրս չգրել նրան այդ վիճակով, սակայն , կալանավոր կնոջն առանց հենակի, առանց տեղափոխման հարմարանքների ստիպել են ոտքով տեղափոխվել, նա հեկեկալով հայտարարել է, որ չի կարողանում շարժվել:
Մանրամասները «Առավոտ» օրաթերթի առաջիկա համարներից մեկում:
Ռուզան ՄԻՆԱՍՅԱՆ
