Այսօր ԱԺ հայտարարությունների ժամին «Ժառանգության» պատգամավոր Զարուհի Փոստանջյանը Մարդու իրավունքների պաշտպանի զեկույցից հիշեցրեց այն հատվածը, թե որ ատյանի դատարանում ինչ չափի կաշառք են ուզում. «Դատական կաշառքի սակագները. Առաջին ատյանի դատարան՝ 500-10 հազար ԱՄՆ դոլար, Վերաքննիչ դատարանում՝ 2000-15 հազար ԱՄՆ դոլար, Վճռաբեկ դատարանում՝ 10-50 հազար ԱՄՆ դոլար»:
Նա կարդաց, թե ինչում են մեղադրում քաղաքացիական ակտիվիստ Վարդգես Գասպարիին. «Նա դատական նիստը նախագահող դատավոր Ռուզան Հակոբյանի հասցեին արտահայտվել է՝ ձեր նման անարժանապատիվ եւ անինքնասեր դատավորներն են, որ այսօր իրավիճակը հասցրել են այստեղ: Միայն այն, որ ՄԻԵԴ-ում ձեր վճիռներից 46-47-ը ճանաչվել է անվավեր, դա պետք է ձեզ մի քիչ հուզեր: Բայց քանի որ դուք անարժան եք եւ անինքնասեր, ձեր գործակալական լիազորություններն եք կատարում, դուք ստոր եւ անարժանապատիվ դատավորներ եք: Որպես գործակալներ՝ այս հանցավոր իշխանությունը պահում եք իրենց գործի վրա: Սա՛ է ասել Վարդգես Գասպարին եւ այս արտահայտության համար նրան մեղադրանք են առաջադրել եւ ապօրինի կալանավորել են, որ նման վարքագիծ ՀՀ քաղաքացին չկարողանա դրսեւորի»:
Հռիփսիմե ՋԵԲԵՋՅԱՆ
