Լրահոս
Օրվա լրահոսը

«Օձի թթու» եւ օրհնված խաչով գաթա. այսօր տոնում են Միջինքը (ֆոտոշարք եւ տեսանյութ)

Մարտ 02,2016 16:13

Հայ Առաքելական եկեղեցու տոնացույցով այս տարի Մեծ պահքի Միջինքը մարտի 2-ին է: Տոնի խորհրդի մասին այսօր «Հայացք» մամուլի ակումբում խոսեց Արարատյան Հայրապետական թեմի առաջնորդանիստ Սուրբ Սարգիս եկեղեցու հոգևոր հովիվ Տեր Պետրոս ավագ քահանա Մալյանը:

«Միջինքով կիսվում է Մեծ պահքը, այն Մեծ Պահքի 24-րդ օրն է: Միջինքն այն տոներից է, որը տասնյակ տարիներ մոռացության է մատնվել: Միջինքի հետ կապված ժողովրդական գեղեցիկ ավանդություն կա: Որպեսզի պահքի դժվարությունը մեղմացվի, ժողովուրդը Միջինքի օրն այցելում է հարազատներին եւ ուրախանում: Միջինքով պահքը չի լուծվում: Փոքրիկ ուրախությունները հիմնականում ուտեստների, համեստ երգուպարի տեսքով են դրսեւորվում: Սա եւս մեկ առիթ է` հոգեւոր եւ մարդկային շփման»,-ասաց նա:

Արարատյան հայրապետական թեմն ավանդաբար նշում է ազգային-եկեղեցական տոները, այդ թվում` Միջինքը եւ նպաստում ազգային ավանդույթների վերականգնմանը:

FILE7690 FILE7684-copy FILE7680 FILE7670 FILE7658

ԱՀԹ տեղեկատվական բաժնի թեմական ծրագրերի համակարգող Հասմիկ Միրզոյանն էլ ներկայացրեց Միջինքին պատրաստվող ուտեստները` գաթան, «Օձի թթուն», «Թթվե պասը», որոնք պահոց ուտեստներ են. «Հետաքրքիր է, որ գաթայի մեջ մետաղադրամի փոխարեն օրհնված խաչ ենք տեղադրում: Փորձը ցույց է տալիս, որը իսկապես օրհնվում է նա, ում բաժին է ընկնում նշանը: Ինչ վերաբերում է «Օձի թթվին», ապա այն իրենից ներկայացնում է կոլոլակով ապուր: Պատրաստվում է  ոսպից, մանրաձավարից եւ ալյուրից եւ եփվում թթվի ջրի մեջ: Տարօրինակ է, բայց շատ համեղ է: Նաեւ զանազան կանաչեղեն է օգտագործվում»,-ասաց Հասմիկը:

Նա նշեց, որ ըստ ժողովրդական ավանդության` գաթան դնում են տան փոքրի մեջքին, ապա կտրատում. «Դա նշանակում է, որ բարիքը փոխանցվում է ավագից կրտսերին: Հին Ջուղայում ավանդույթ կա. եթե դանակը դիպչում է գաթայի մեջ դրված նշանին, տարվա եկամտի աղբյուրը հողն է լինում: Դանակն էլ համեմատում են գութանի խոփի հետ»:

Ի դեպ, բանախոսները Միջինքի գաթա էին բերել եւ հյուրասիրեցին լրագրողներին: Օրհնված խաչը բաժին ընկավ «Հայացք»-ի ղեկավար Լուսինե Մանանդյանին:

Լուիզա ՍՈՒՔԻԱՍՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Մարտ 2016
Երկ Երե Չոր Հնգ Ուրբ Շաբ Կիր
« Փետ   Ապր »
 123456
78910111213
14151617181920
21222324252627
28293031