Այսօր Էրեբունի եւ Նուբարաշեն վարչական շրջանների ընդհանուր իրավասության դատարանում «օֆշորի գործով» դատական նիստն էր: Ամբաստանյալ Աշոտ Սուքիասյանն ու նրա պաշտպանը՝ Յուրիկ Խաչատրյանը մի տեսանյութ ներկայացրեցին՝ ապացուցելու, որ մինչեւ տուժող Փայլակ Հայրապետյանին հանդիպելը ինքը խոշոր գործարար է եղել:
Մեղադրող դատախազը, Հայրապետյանի ներկայացուցիչները վստահեցրին, որ միայն կադրեր են, ոչ մի խոսակցություն չկա, ի՞նչ է երեւում տեսանյութից՝ այն, ինչ ցուցադրվում է, դրանց սեփականատերը հենց Աշոտ Սուքիասյա՞նն է, թե՞ ուրիշը: Անգամ դատավորը մի քանի դիտարկում արեց, որ սեղանի գլխին նստած նկար են ցուցադրում ու ասում, ժողով ենք անում, ես սեղանի գլխին եմ, երեւում է որ ես սեփականատերն եմ:
Այս առնչությամբ Աշոտ Սուքիասյանն ասաց, որ «Աֆրիկայի արդարադատության նախարարության թղթերը կան, որ ես սեփականատեր եմ եղել, փաստաթղթեր կան, որ գումարներ եմ փոխանցել, տեխնիկա եմ գնել 16 մլն դոլարի: Աֆրիկայի էկոնոմիկայի նախարարության թղթերը կան»:
Պաշտպանական կողմը խոստացավ այդ բոլոր փաստաթղթերը վաղը ներկայացնել:
Կարդացեք նաև
Աշոտ Սուքիասյանը նաեւ հայտարարեց, որ Հայրապետյանին ոչ մեկը վարկ չէր տրամադրի, ինքը շատ վատ վարկային պատմություն ուներ. «Եկել էր Աֆրիկա որսի, որ մեկին էլ գտներ, իր համար վարկ վերցներ: Այնպես որ, ես կարիք չունեի ոչ իր ժողովի, ոչ էլ Հայրապետյանի: Հայրապետյանը խնդրեց, որ ես իրեն օգտակար լինեմ, քանի որ իր անունով հնարավոր չէր վարկ վերցնել, ես էլ վերցրեցի: Ես եմ բանկերի իր պարտքերը փակել, անձական պարտքեր էլ ուներ, այդ պարտքերն եմ փակել՝ գազի, ջրի, լույսի պարտքերն եմ փակել»: Փայլակ Հայրապետյանը բորբոքվեց. «Ամոթ չե՞ս անում, ա՛յ տղա»:
Աշոտ Սուքիասյանը հայտարարեց, որ խոշոր գործարար Հայրապետյանի անունը միֆ էր, ես ծանոթացել եմ սնանկացած, խեղճացած Հայրապետյանի հետ: Նա դատարանին հորդորեց մեկ զանգով ճշտել բանկից, թե ինչպես են Հայրապետյանի անունը լսել ու չեն ուզել նրան վարկ տալ:
Դատարանը ապացույցների հետազոտման փուլն արդեն ավարտում է:
Հաջորդ դատական նիստը նշանակվեց մարտի 10-ին, ժամը 12-ին:
Հռիփսիմե ՋԵԲԵՋՅԱՆ
