Հյուսթանում կայացած ծանրամարտի աշխարհի առաջնությունում հայաստանցի գերծանր քաշային ծանրորդ Գոռ Մինասյանը երկամարտի 437 կիլոգրամով զբաղեցրեց 4-րդ հորիզոնականը, իսկ ռուսաստանցի Սերգեյ Լովչեւը ռեկորդային 475 կիլոգրամով դարձավ չեմպիոն: Սակայն դրանից հետո Լովչեւի դոպինգ նմուշում հայտնաբերվեց վերջին սերնդի իպամորելին դոպինգ, ինչի համար նա ժամանակավորապես հեռացվեց IWF-ի հովանու ներքո անցկացվող բոլոր մրցումներից:
Դրանից հետո Ռուսաստանի ծանրամարտի ֆեդերացիան եւ ինքը՝ Լովչեւը, դիմեցին IWF՝ լաբորատոր փաստաթղթերը իրենց տրամադրելու, «B» սրվակը բացելու եւ անկախ լսումներ կազմակերպելու խնդրանքով:
«Р-спорт»-ը իրավիճակին ծանոթ աղբյուրից տեղեկացել է, որ Մոնրեալի հակադոպինգային լաբորատորիայում «B» սրվակը նույնպես դրական արդյունք է տվել: Եթե այս տեղեկությունը հաստատվի, Լովչեւը բաց կթողնի օլիմպիական խաղերը, իսկ Գոռ Մինասյանը կհռչակվի աշխարհի առաջնության բրոնզե մեդալակիր:
Աշոտ ՀԱԿՈԲՅԱՆ
