Եթե իշխանությունն իրապես ուզում է ընտրական գործընթացների հանդեպ վստահություն ստեղծել, պետք է սահմանափակումների քանակը կրճատեին, ավելի լիբերալ դարձնեին, ոչ թե այսպիսի անհեթեթ սահմանափակումներ մտցնեին: Այսօր «Մեդիա կենտրոնում» ընտրական նոր օրենսգրքի նախագծի թեմայով քննարկման ժամանակ ընտրատեղամասում ԶԼՄ ներկայացուցիչների եւ դիտորդների քանակի սահմանափակման հետ կապված այսպիսի տեսակետ հայտնեց «Հրապարակ» օրաթերթի գլխավոր խմբագիր Արմինե Օհանյանը:
Նա չբացառեց, որ կարող են ստեղծվել այդ օրերին կեղծ լրատվամիջոցներ, կեղծ բեյջերով մարդիկ, որոնք կմտնեն ընտրատեղամաս եւ մյուս լրագրողները կզրկվեն ընտրական գործընթացին հետեւելու հնարավորությունից:
Արմինե Օհանյանի խոսքերով՝ ընտրատեղամասում հնարավոր էլ չի պարզել՝ կեղծ բեյջով անձը լրագրո՞ղ է, թե՞ լրագրող չի. «Եթե ինքը ներկայանա, ասենք՝ Tuqumur.am-ի լրագրող, ինքը հանգիստ կարող է մտնել, այն դեպքում, երբ իրական լրագրողները կարող են դուրս մնալ: Մեր աչքը վախեցած է իշխանությունների կողմից ձեռնարկվող քայլերից»:
Խոսքի ազատության պաշտպանության կոմիտեի նախագահ Աշոտ Մելիքյանի խոսքերով՝ դա կամայականության հնարավորություն է տալիս:
Կարդացեք նաև
«Իրազեկ քաղաքացիների միավորում» հ/կ ծրագրերի համակարգող Դանիել Իոաննիսյանն էլ չբացառեց, որ իշխանությունները հատուկ են այսպիսի դրույթներ ներառել նախագծում, որ դրա շուրջ ծավալվեն քննարկումները եւ մոռանան կարեւոր մյուս հարցերը: Արդյունքում տեղի կտան, այդ դրույթները կհանեն եւ կասեն՝ մենք լսել ենք ձեր՝ քաղաքացիների ձայնը, թեեւ իրականում ոչ մի առաջընթաց չի լինի:
Դա չբացառեց նաեւ պարոն Մելիքյանը. «Բայց եթե դա նույնիսկ այդպես է, այսպիսի աբսուրդ կետերը չեն կարող անտեսված լինել: Հանրությունը պետք է արձագանքի թե՛ այս աբսուրդին, թե՛ մյուսին»: Աշոտ Մելիքյանն ասաց, որ պատրաստվում են իրենց առաջարկները ներկայացնել ԱԺ:
Հռիփսիմե ՋԵԲԵՋՅԱՆ
