«Բանակցել` չի նշանակում «զիջում»: Դա շատ լավ մշակույթ է ձեւավորված, մենք էլ շարունակում ենք այդ մշակույթը, որպեսզի լսենք ողջամիտ առաջարկություններ: Այդպիսիք անպայման կընդունվեն իշխանության կողմից»,-այսօր Մ. Հերացու անվան բժշկական համալսարանում կազմակերպված կրթաթոշակների հանձնման միջոցառումից առաջ լրագրողների հետ զրույցում ասաց ՀՀ վարչապետ Հովիկ Աբրահամյանը` մեկնաբանելով Ընտրական օրենսգրքի շուրջ իշխանություն-ընդդիմություն բանակցությունները:
Ինչ վերաբերում է Լեւոն Զուրաբյանի հայտարարությանը, թե բանակցելու միջոցով փորձելու են իշխանությանը ճնշել եւ ստիպել, որպեսզի վերջինս սկզբունքային զիջումների գնա, Հովիկ Աբրահամյանը հորդորեց «մշակույթը» «ճնշումից» տարանջատել. «Յուրաքանչյուր ողջամիտ առաջարկություն, որը կհնչի ընդդիմության կողմից, պատրաստ ենք քննարկել: Մենք միշտ ականջալուր ենք»:
Լրագրողի ակնարկին, թե այդ ամենը, փաստորեն, ձեւական է, վարչապետն այսպես արձագանքեց. «Այդ դուք եք «ձեւական» ձեւակերպում, մենք շատ լուրջ ենք վերաբերվում ցանկացած ողջամիտ առաջարկի»:
Լեւոն Զուրաբյանի մեկ այլ հայտարարությանը, թե վարչապետը հովանավորել է «Ոչ»-ի շտաբը, Հովիկ Աբրահամյաննն ասաց. «Եթե նա հստակեցնի իր ակնարկը, ես կպատասխանեմ Ձեր հարցին»:
Կարդացեք նաև
Լուիզա ՍՈՒՔԻԱՍՅԱՆ
