Կոմիտասի թանգարան-ինստիտուտում ընթանում է դասական երաժշտության բնագավառում «Երգեցողություն» անվանակարգում ՀՀ նախագահի երիտասարդական մրցանակի հավակնորդների առաջին` ընտրական փուլը: «Հիանալի երգիչներ են մասնակիցները, նոր ձայներ են բացահայտվում»,- Aravot.am-ին ասաց թանգարան-ինստիտուտի երաժշտական բաժնի ղեկավար Հասմիկ Բաղդասարյանը:
Նրա փոխանցմամբ` մրցույթի եզրափակիչ փուլը տեղի կունենա մարտի 29-ին` Կոմիտասի թանգարան-ինստիտուտի դահլիճում:
Մրցույթի մասնակիցներից Գոհար Բադալյանը Մոսկվայի երաժշտական քոլեջում սովորելուց հետո եկել է Երեւան` Կոնսերվատորիայում բարձրագույն կրթություն ստանալու. «Չէի մտածում, որ հայրենիք կգամ: Որոշմանս մեջ դեր խաղաց կնքահայրս: Նա ասաց, որ մասնագիտական գործունեությունս պետք է սկսեմ Հայաստանում, ոչինչ, որ հետագայում ցանկանամ արտերկիր գնալ: Ես լսեցի նրան եւ չեմ փոշմանել»,-Aravot.am-ին պատմեց նա:
Գոհարի խոսքով` մեր երկրում երիտասարդ մենակատարները դրսեւորվելու խնդիր ունեն, որովհետեւ Օպերային թատրոնը մեկն է. «Եթե մի քանի օպերային թատրոններ լինեին, կարծում եմ, մեր տաղանդավոր օպերային երգիչները չէին գնա ուրիշ երկրում կայանալու: Այստեղ պարզապես հնարավորություններն են քիչ»:
Կարդացեք նաև
Երգչուհին տեղեկացրեց, որ դաշնակահար Լեւոն Ջավադյանի ստեղծած երիտասարդ մենակատարների խմբում է հանդես գալիս, առաջիկայում կներկայանան համերգներով: Գոհար Բադալյանը Մոսկվայում եւս մասնակցել է մրցույթների եւ փառատոնների. «Մոսկվայում շատ են համերգասրահները, շատ ելույթներ եմ ունեցել, այդ թվում` բարեգործական համերգներին»:
Տիգրան Օհանյանը եւս Կոնսերվատորիայի ուսանող է եւ Լեւոն Ջավադյանի երիտասարդ օպերային մեներգիչների ծրագրի մասնակից: Նրա դիտարկմամբ` մրցույթը երգչի համար զարգանալու հնարավորություն է. «Սխալ է, երբ մասնակիցը մտածում է մրցույթի մասնակցել` հաղթելու նպատակով: Պարզապես պետք է փորձել լավ երգել, գումարն ու մրցանակը չպետք է հետաքրքրեն»:
Տիգրանը 2015թ.-ին Ռիգայում մասնակցել է միջազգային մրցույթի. «80 մասնակիցների թվում հայ կատարողներն 9-նն էին: Եզրափակիչ անցանք ես եւ Հայկ Տիգրանյանը: Նա գրավեց 3-րդ տեղը, ես ստացա հատուկ մրցանակ»: Տիգրանն անկեղծացավ, որ առաջիկա տարում չի ցանկանում հեռանալ Հայաստանից. ուժերը կփորձի Օպերային թատրոնում, իսկ հետո գուցե մեկնի Եվրոպա. «Այսօր մեր երկրում մարդիկ այդքան չեն կարեւորում օպերան, ինչը ցավալի է: Շատ երգիչներ են գնացել, օպերան անկում է ապրում: Ցավոք, երեկ մահացավ այն մարդկանցից մեկը, որը փորձում էր օպերան ծաղկեցնել: Ի դեպ, այսօր ես կատարեցի այն ծրագիրը, որը միշտ կատարել է Գեղամ Գրիգորյանը»:
Լուիզա ՍՈՒՔԻԱՍՅԱՆ
