Լեռնային Ղարաբաղի Հանրապետության օդային դարպասներ համարվող Ստեփանակերտի օդանավակայանը գտնվում է Ստեփանակերտից 10 կմ հեռավորության վրա: 1992 թվականին օդանավակայանը դադարեցրել է իր աշխատանքները, եւ 2008 թվականին սկսվել են գլխավոր մասնաշենքի կառուցման աշխատանքները, որոնք ավարտվել են 2011 թվականին:
Օդանավակայանն ունի թեթեւ ավիացիա, 2 հատ երկու տեղանոց օդանավեր, որոնք պարբերաբար շահագործվում են. տուրիստական թռիչքներ են կատարում, փորձում են գյուղատնտեսության մեջ ներգրավել, ուսումնական ծրագրեր ունեն: Այս մասին լրագրողների հետ զրույցի ընթացքում ասաց ԼՂՀ էկոնոմիկայի նախարարի տեղակալ Տիգրան Գաբրիելյանը, որը նաեւ կառավարում է ավիացիայի բնագավառը:
Նա նշեց, որ օդանավակայանը կահավորված է բոլոր գերժամանակակից տեխնիկական անհրաժեշտություններով, որոնք համապատասխանում են միջազգային չափանիշներին. «Մեր իրավական փաստաթղթերը, որոնք պետք է կարգավորեն օդային երթեւեկությունը համապատասխանում են ԻԿԱՕ (ICAO` Միջազգային քաղաքացիական ավիացիոն կազմակերպություն) չափանիշներին, լիարժեք միջազգային չափանիշներին համահունչ են: Այսօրվա դրությամբ ամբողջությամբ ձեւավորված են իրավական չափանիշները եւ օդանավակայանը կահավորված է»:
Տիգրան Գաբրիելյանը նշեց, որ իրենց լիազորությունները նրանում է, որ ցանկացած պահին պատրաստ լինեն օդանավ ընդունել. «Այդ օրը գալու է, անպայման»: Էկոնոմիկայի փոխնախարարի խոսքերով՝ օդանավակայանը պատրաստ է ընդունել մեկ ուղերթից 100 ուղեւոր եւ բազմաթիվ չվերթներ: Անձնակազմը եւս պատրաստ է. անցել է համապատասխան ուսումնական գործընթացները, եւ այժմ էլ կազմակերպվում են դասընթացներ, որպեսզի աշխատակազմը պատրաստ լինի կատարել աշխատանքը. «Այսօրվա դրությամբ էլ եւս հույս կա, որ օդանավակայանը պարտադիր գործելու է»:
Կարդացեք նաև
Տիգրան Գաբրիելյանը հայտնեց նաեւ, որ օդանավակայանը ունի շահագործման սերտիֆիկատ՝ տարեկան մեկ անգամ ստուգում է կատարվում եւ աուդիտ է արվում: Օդանավակայանը ֆինանսավորում է պետական բյուջեից, մոտավորապես կա 60 հաստիք. «Օդանավակայանը բաղկացած է օդային երթեւեկության կազմակերպումը համատեղ է, իսկ մի շարք երկրներում՝ առանձին է: Այսինքն՝ 60-ը կարող է մեծ թիվ երեւալ, բայց իրականում նրանց մեծ մասը ինժեներական, տեխնիկական անձնակազմն է, որը սպասարկում է նավիգացիոն համակարգերը»:
Ամի ՉԻՉԱԿՅԱՆ
