ՀՀ պաշտպանության նախկին նախարար Վաղարշակ Հարությունյանի կարծիքով` ռազմական գործողությունները սահմանին կարող են տևել մեկ շաբաթ:
«Մեդիա կենտրոնում» հրավիրված քննարկմանը պարոն Հարությունյանը շեշտեց, թե Ադրբեջանն այս ռազմական գործողությունների ընթացքում աշխատել է իր ողջ բանակով, իսկ հայկական կողմից միայն ԼՂՀ պաշտպանական բանակը, ուստի կարելի է պատկերացնել, թե ինչ կլիներ Ադրբեջանի հետ, եթե հայկական զինված ուժերն էլ միացած լինեին:
Այս օրերին քննարկվող հարցերից է նաև Հայաստանի` ԼՂՀ անկախության ճանաչել-չճանաչելու հարցը: Պարոն Հարությունյանը սա ժամանակավրեպ է համարում ու նշում` այն, որ ՀՀ-ն իր ռազմական դոկտրինում գրել է, որ ՀՀ-ն Արցախի անվտանգության երաշխավորն է, դա առաջին քայլն էր դեպի ճանաչում, ինչը Ադրբեջանը չընկալեց, և դա մեր ազդակն էր արտաքին աշխարհին, որ լռում ու դիմանում ենք, բայց նաև թող Ադրբեջանը հասկանա:
Պարոն Հարությունյանի պնդմամբ` այս ամենից Ադրբեջանը շահած դուրս չի գալիս, այլ նա դարձել է Թուրքիայի զոհը:
«Մոդուս վիվենդի» կենտրոնի ղեկավար Արա Պապյանը Ղարաբաղը Հայաստանին միացնելու կողմնակիցն է:
Կարդացեք նաև
Նա նշեց այն խնդիրները, որոնք կարող են ճանաչման դեպքում առաջանալ. «Ամենակարևորը յոթ շրջանների խնդիրն է: Եթե ճանաչենք ԼՂՀ անկախությունը, ապա քաղաքացիության հարցը ո՞նց է լուծվելու: Չպետք է կտրատելով հարցը լուծենք, հարցը պիտի լուծվի միանգամից, և ընկալումն էլ համապատասխան կլինի»:
ԼՂՀ արտաքին քաղաքականության և անվտանգության հասարակական խորհրդի նախագահ Մասիս Մայիլյանը ԼՂՀ ճանաչման մասին նշեց. «Մենք բոլորս միացման կողմնակից ենք»: Դառնալով առաջիկա զարգացումներին`պարոն Մայիլյանն ասաց. «Իմ տպավորությամբ` ամենաթեժ փուլն անցել է, առնվազն պետք է վերականգնենք այն դիրքերը, որոնք եղել են մինչև ապրիլի 2-ը: Ցանկալի է, որ Ադրբեջանը պատիժ կրի նաև տարածքային առումով: Հենց այդ խնդիրները լուծվեն, դրանցից հետո այս գործողությունները կդադարեն»:
Տաթև ՀԱՐՈՒԹՅՈՒՆՅԱՆ
