Այժմ ԱԺ-ում քննարկվում է Դուշանբեում ստորագրված «Արտաքին սահմաններում ճգնաժամային իրավիճակների առաջացման եւ կարգավորման (վերացման) ժամանակ օգնության ցուցաբերման հարցում Անկախ պետությունների համագործակցության մասնակից պետությունների սահմանապահ եւ այլ գերատեսչությունների` փոխգործակցության կազմակերպման կանոնակարգի հաստատման մասին» արձանագրությունը:
ՀՀ կառավարությանն առընթեր Ազգային անվտանգության ծառայության տնօրենի տեղակալ Արզուման Հարությունյանը բացատրեց, որ պատերազմական իրավիճակների, տարբեր ահաբեկչությունների դեպքում, եթե մի երկրում խուճապ լինի եւ միգրանտների հոսք, այս համաձայնագիրը դրա համար է, որ օգնություն ցուցաբերվի:
Ալեքսանդր Արզումանյանը հարցրեց. «Տեղեկանք եք ներկայացրել 2012-ի նոյեմբերի 7-ից, որ միացել են Բելառուսը, Ղազախստանը եւ Ղրղըզստանը: 2016 թիվն է, այս ընթացքում որեւէ մեկը 11 երկրներից վավերացրե՞լ է: Սենց տեղեկանք եք բերել՝ 4-ամյա վաղեմության: Հետո ստորագրել է մեկը՝ Ուկրաինան: Էդ Ուկրաինան հիմա համագործակցո՞ւմ է: Սա մի կողմից ոնց որ վիրավորական լինի, անհարգալից վերաբերմունք: Էս պահին, որ մեր արտաքին սահմանը ռմբակոծվում է, էս ստորագրողներին մենք ի՞նչ պատգամ ենք ուղարկում: Սա վավերացնում ենք, որ ի՞նչ անենք: Ղազախստանը, որը ուժի մեջ է մտցրել, հրաժարվում է նույնիսկ Երեւան գալու ու ժողովներ այստեղ անելու: Այս օրերին սա բերելո՞ւ բան է: Ի՞նչ կարիք կա սրա, ի՞նչ պատգամ ենք ուղարկում: Մի քիչ բան լինենք, էլի: Երեկ նախագահն ասաց՝ մտահոգ ենք, որ ՌԴ-ն զենք է վաճառում, եկեք սրանից էլ մտահոգվենք եւ ամեն դեմ տված թուղթ չվավերացնենք»:
Արզուման Հարությունյանն ասաց, որ արձանագրությունը ստորագրված է Բելառուսի, Ղրղըզստանի, Տաջիկստանի, Ղազախստանի, ՀՀ-ի եւ ՌԴ-ի կողմից:
Կարդացեք նաև
Ալեքսանդր Արզումանյանը մեղադրեց ԱԺ-ի ղեկավարությունը, որ այդ նրբանկատությունը չի նկատել եւ չի հանել այս հարցը օրակարգից. «Ես կոչ եմ անում հանել սա օրակարգից: Հանենք, հասկանանք, էսօր բարեկամները ի՞նչ մտադրություն ունեն մեր նկատմամբ, տեսնենք՝ համագործակցո՞ւմ ենք, թե՞ ոչ»:
ԱԺ արտաքին հարաբերությունների հանձնաժողովի նախագահ Արտակ Զաքարյանն էլ ասաց, որ սա կարեւոր փաստաթուղթ է եւ հանձնաժողովը տվել է դրական եզրակացություն:
Հռիփսիմե ՋԵԲԵՋՅԱՆ
