«Պետությունը շատ խիստ վերաբերմունք է ցույց տվել՝ ընդհուպ չի նայել՝ արքեպիսկոպոս է, թե չգիտեմ ով է, բոլոր դեպքերում կոշտ ձևերով մտքերի ընթացքը կասեցրել է։ Եվ մտքերի ընթացքը պետք է կասեցնենք, որ ձեռներ և ոտեր ջարդելու անհրաժեշտություն չլինի»,- կառավարության նիստից հետո, ճեպազրույցում հայտարարեց Նիկոլ Փաշինյանը։
Լրագրողը հետաքրքրվել էր՝ Նիկոլ Փաշինյանը քաղաքացիական պատերա՞զմ է հրահրում։ Նա նկատի ուներ այն, որ Փաշինյանը լիակատար սատարում է խորհրդարանում ՔՊ-ական պատգամավորների կեցվածքը եւ ասում է, որ սահմանադրական փոփոխություններին հասնելու համար հանրային ճնշում կգործադրի ընդդիմության նկատմամբ։ Լրագրողը նաեւ հիշեցրեց, որ ՀՀ կառավարությունից ոչ ոք նման փութաջանությամբ չի պատասխանում Ադրբեջանից հնչող հայտարարություններին, այդ թվում նաեւ Ադրբեջանի նախագահի օգնական Հիքմեթ Հաջիեւին, որն ակնկալում է, թե հայ ժողովուրդը պետք է ադրբեջանցիներից ներողություն խնդրի։
«Ես ասում եմ՝ ով որ փորձի բռնություն գործադրի, իշխանությունը այդ բռնություն գործադրող ձեռը կջարդի։ Շատ կոնկրետ բան եմ ասում, որովհետև դա իշխանության պարտականությունն է, այդ թվում՝ ձեր ասածը թույլ չտալու համար, որպեսզի երկրում ամենաթողություն լինի։ Եվ իմիջիայլոց այդպիսի փորձեր եղել են՝ ռազմական հեղաշրջման փորձի նման բաներ է եղել, զինված ինչ-որ բաներ անելու փորձ է եղել»,- հավելեց նա։
Թե ինչո՞ւ Նիկոլ Փաշինյանի իշխանության ժամանակ եղած աղմկահարույց սպանությունները չեն բացահայտվում՝ տեսանյութում
Կարդացեք նաև
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
