Այսօր ՀՀԿ պատգամավոր Մնացական Մնացականյանը ԱԺ-ում Ընտրական օրենսգրքի քննարկման ժամանակ կառավարության աշխատակազմի ղեկավար-նախարար Դավիթ Հարությունյանին հարցրեց, թե ինչպե՞ս կարող են կանխել ընտրության նկատմամբ վերահսկողությունը. «Կոնկրետ վերջերս ընտրությունների ժամանակ դեպքեր են եղել, նայում ես՝ 70 տարեկան կինը փեշի տակից քվեաթերթիկ է հանում: Արդեն 18-80 տարեկանները հեռախոսով նկարում են իրենց քվեաթերթիկները: Դուք սրա մասին ի՞նչ կարծիք ունեք»:
Դավիթ Հարությունյանը պատասխանեց. «Կարուսելը եւ լուսանկարահանումը կորցնում են իրենց արժեքը: Ի վերջո` մարդիկ լուսանկարահանում են, որպեսզի դարձնեն ընտրությունները վերահսկելի: Այդ երկու մեխանիզմները՝ կարուսելն ու լուսանկարահանումը գործում են մի պայմանում, եթե քվեաթերթիկները սահմանափակ են եւ անձը ստանում է 1 քվեաթերթիկ: Բայց ԱԺ ընտրությունների ժամանակ չօգտագործված քվեաթերթիկները արկղով դրված են, մարդիկ այնտեղ են նետում: Բացարձակապես որեւէ արժեք չունի քվեաթերթիկը, ինքը ընդհանրապես հատուկ հաշվառման փաստաթուղթ չէ: Կարուսելի գաղափարախոսին կարելի է մի 15 հատ քվեաթերթիկ տանել, նվեր տալ: Մենք ուզում ենք, որ վերանա հսկողությունը ընտրողի կամքի արտահայտման նկատմամբ: Եթե քվեաթերթիկները անսահմանափակ են, մաքուր քվեաթերթիկը հեշտ հասանելի է, սրա գաղափարը վերանում է: Մարդը կարող է մի հատ քվեաթերթիկ վերցնել, նշել այն մարդու անունը, ով վերահսկում է, լուսանկարել, հետո շպրտել դա ու վերցնել նոր քվեաթերթիկ, նշել վրան ում ուզում է»:
Մնացական Մնացականյանը նաեւ առաջարկեց, որ քվեախուցը հակառակ կողմով դնեն, ոչ թե մարդը մեջքով կանգնի դեպի պատը, այլ՝ հակառակը, որպեսզի պայուսակից ինչ-որ բաներ չհանի ու ընտրակեղծարարություն չանի, հանձնաժողովի անդամները տեսնեն, թե ինչով է զբաղված:
Դավիթ Հարությունյանը պատասխանեց, որ դա վերահսկելի կդարձնի եւ ավելի հավանական է, որ մեջքի հետեւից կտեսնեն իր ընտրությունը:
Կարդացեք նաև
Հռիփսիմե ՋԵԲԵՋՅԱՆ
