Լրագրողները ԱԺ պատգամավոր Զարուհի Փոստանջյանին մայիսի 5-ին «Հայելի» մամուլի ակումբում խնդրեցին անդրադառնալ նաեւ Թեւան Պողոսյանի նախաձեռնությանը:
«Ես դա լուրջ չեմ ընդունում ու չեմ անդրադառնա դրան»,- պատասխանեց նա:
Հիշեցնենք՝ Թեւան Պողոսյանը հանդես է եկել նախաձեռնությամբ, որով առաջարկում է պետականորեն երաշխավորել 18 տարին լրացրած պարտադիր զինվորական ծառայության զինակոչվող քաղաքացիների սեռաբջջի պահպանությունը:
Սակայն Զարուհի Փոստանջյանը խոսեց Թեւան Պողոսյանի եւ Ռուբեն Հակոբյանի հեղինակած օրենքի նախագծի մասին: Հիշեցնենք, որ պատգամավորներն այդ նախագծով առաջարկում են ուսման ընթացքում արական սեռի ներկայացուցիչներին զինծառայության համար տարկետում չտալ:
Կարդացեք նաև
«18 տարեկան մեր զավակները, չեմ կարծում, որ պետք է առաջնագծում լինեն: Եվ բոլորին՝ ե՛ւ կանանց, ե՛ւ տղամարդկանց, զինակոչելու հարցում պետք է հաշվի առնենք միջազգային փորձը: Հիմա թույլ է տրվում կանանց մասնակցել պարտադիր զինվորական ծառայությանը, բայց ոչ թե պարտադրել, այլ եթե մարդը ցանկանում է: Եթե մենք պարտադրում ենք, պետք է հաշվի առնել հետագայում երիտասարդ աղջիկները, կանայք քանի երեխա չպետք է ունենան, եւ արդյոք հավասարազոր է բոլոր պաշտպանական մեխանիզմներին, որովհետեւ երեխա ունենալը նույնպես պաշտպանություն է, նույնպես անվտանգություն է»,- ասաց Զարուհի Փոստանջյանը:
Բացի այդ, նա հավելեց, որ բանակին պետք են ե՛ւ 18 տարեկանները, եւ՛ բակալավրիատ ավարտածները, ե՛ւ մագիստրոսները. «3 ցենզերն էլ անհրաժեշտ են: Այնպես չէ, որ բանակը կարիք չունի բակալավրիատի գիտելիք ունեցող անձի: Մենք իրավունք չունենք զրկել մեզ»:
Ամի ՉԻՉԱԿՅԱՆ