«Կառավարության դիրքորոշումն առաջին քայլն է, բայց դա դեռ լիարժեք չէ»,- մայիսի 5-ին «Հայելի» մամուլի ակումբում լրագրողների հետ հանդիպման ընթացքում ասաց ԱԺ պատգամավոր Զարուհի Փոստանջյանը:
Հիշեցնենք՝ Հայաստանի Հանրապետության կառավարությունը հավանություն է տվել Ազգային ժողովի պատգամավորներ Զարուհի Փոստանջյանի եւ Հրանտ Բագրատյանի՝ «Արցախի Հանրապետությունը ճանաչելու մասին» ՀՀ օրենքի նախագծի վերաբերյալ եզրակացությունը:
Անդրադառնալով Սերգեյ Լավրովի հայտարարությանը, թե խուճապի պետք չէ մատնվել, քանի որ Հայաստանի Հանրապետությունը չի քննարկում այդ հարցը, այլ երկու պատգամավորները, քանի որ ՀՀ-ում ընթացակարգն այդպիսին է, Զարուհի Փոստանջյանը նշեց. «Բացարձակ որեւէ մի պետության արտաքին գործերի նախարարության հայտարարությունը չի կարող լինել մեզ համար կողմնորոշիչ Հայաստանի եւ Արցախի Հանրապետության քաղաքացիներին: Սա մեր խնդիրն է եւ մեր քաղաքական հայտն է եւ ցանկանում ենք, մենք ցանկանում ենք տարածաշրջանում լինել լուրջ քաղաքական գործոն: Եվ լուրջ քաղաքական գործոնը պայմանավորված է նաեւ, իհարկե՛, Հայաստանի Հանրապետության կողմից Արցախի ճանաչմամբ: Հետեւաբար՝ մենք չենք անդրադառնալու այս կամ այն պետության արտաքին գործերի նախարարների հայտարարություններին, նրանք մեզ համար ուղենիշ չեն, այլ մենք ուղղորդվում ենք մեր ազգային շահով»:
Հարցին, թե արդյոք նա մտավախություն չունի, որ Ազգային ժողովում «Արցախի Հանրապետությունը ճանաչելու մասին» նախագիծը չանցնի, Զարուհի Փոստանջյանը ասաց, որ չի բացառում, որ այդպես լինի, քանի որ այնպես չէ, որ Ազգային ժողովում գործում են անկախ անձինք:
Կարդացեք նաև
Ամի ՉԻՉԱԿՅԱՆ
