Տավուշի մարզի Նոյեմբերյանի տարածաշրջանի՝ Վրաստանին սահմանակից Դեբեդավան գյուղի 38-ամյա բնակիչ Ռիտա Երեմովան այսօր՝ մայիսի 16-ին մեզ բողոքեց, որ հայկական հեռուստատեսությամբ իրեն հաճախ են ցույց տալիս:
2014թ. հոկտեմբերին հայտնել ենք, որ 2011թ. Վրաստանի Մառնեուլիի շրջանի բնակիչ 2 ադրբեջանցիներ Ռիտային առաջարկել են իրենց հետ համագործակցել, ռազմական բնույթի տեղեկություններ հաղորդել: Ռ. Երեմովան այդ մասին հայտնել է հայ զինվորականի, Ազգային անվտանգության ծառայությունը:
Հայաստանի հանրային հեռուստաընկերության եթերում ֆիլմ է ցուցադրվել Ադրբեջանի հատուկ ծառայությունների լրտեսական գործունեության մասին, ֆիլմում Ռիտա Երեմովան ներկայացնում է Մառնեուլիի ադրբեջանցիների հետ կապված վերոհիշյալ պատմությունը:
Ընտանեկան նպաստով գոյատեւող Ռ. Երեմովան ասաց, որ ինքն անչափահաս տղա ու աղջիկ ունի, իր 13-ամյա տղան դպրոցում ամեն անգամ վատ է զգում, երբ համադասարանցիներն ասում են, որ իր մորը հեռուստատեսությամբ ցույց են տվել: Ռ. Երեմովան ասաց. «Ես հայրենիքի հանդեպ ոչ մի վատ բան չեմ արել: Դադարեցրեք հեռուստատեսությամբ ինձ ցուցադրելը, ինձ հանգիստ թողեք»:
Կարդացեք նաև
Ոսկան ՍԱՐԳՍՅԱՆ
