2016թ. մայիսի 19-ին հայտնի դարձավ, որ մայիսի 22-ին երկրի իշխող «Արդարություն և զարգացում» կուսակցության արտահերթ համագումարի ժամանակ երկրի վարչապետի և կուսակցության ղեկավարի պաշտոնում կառաջադրվի Թուրքիայի տրանսպորտի նախարար Բինալի Յըլդըրըմի թեկնածությունը։ Թուրքական Yeni akit պարբերականը ծավալուն հոդված է հրապարակել Յըլդըրըմի կնոջ՝ Սեմիհա Յըլդըրըմի մասին։
Թուրքիայի ապագա վարչապետի կինը ծնվել է Էրզինջանի գյուղերից մեկում։ Մասնագիտությամբ մանկավարժ է, երկար տարիներ աշխատել է որպես ուսուցչուհի, այժմ թոշակառու է։ Բինալի և Սեմիհա Յըլդըրըմներն ունեն 3 երեխա՝ երկու տղա և մեկ աղջիկ։
Սեմիհա Յըլդըրըմը (Սեմիհա բառը թուրքերեն նշանակում է մեծահոգի կին) ներգրավված է իշխող կուսակցության ակտիվ կանանց շարքերում և պատասխանատու է սոցիալական տարբեր նախագծերի իրականացման համար։
Կարդացեք նաև
Նախարար Բինալի Յըլդըրըմը վերջերս պատմել էր, թե ինչպես է իր կինն առաջին անգամ աշխատանքի նշանակվել։ Նրան գործուղել են Ստամբուլ, և իրենք տեղափոխվել են այդ քաղաք. «Մենք գնացինք փնտրելու այդ դպրոցը։ Մի ամբողջ օր՝ մինչև երեկո, չկարողացանք գտնել այն։ Ոչ ոք չգտեր դրա տեղը։ Հետո իմացանք, որ այդպիսի դպրոց չկա։ Այնտեղ մի պահեստ կար, որը եթե հետագայում դառնար դպրոց, Սեմիհան պետք է ուսուցչուհի աշխատեր։ Տեսեք՝ որտեղից որտեղ ենք հասել»։
