Թուրքիայի ԱԳ նախարար Մեվլութ Չավուշօղլուն Գերմանիայի Հայոց ցեղասպանությունը ճանաչող բանաձևի ընդունման վերաբերյալ գրառում է կատարել Twitter միկրոբլոգում: «Այլ երկրների պատմությունը խորհրդարանի անպատասխանատու և անհիմն որոշումներով սևացնելը սեփական պատմության մութ էջերը կոծկելու միջոց չէ», – գրել է նա:
Ի՞նչ է ակնարկել Թուրքիայի արտաքին գերատեսչության ղեկավարը «սեփական պատմության մութ էջեր» ասելով: Հավանաբար, որ Գերմանիան նույնպե՞ս մեղավորություն է ունեցել 101 տարի առաջ Օսմանյան կայսրությունում տեղի ունեցած ոճիրում: Եթե այո, ուրեմն Չավուշօղլուն անուղղակիորեն ընդունում է, որ Թուրքիան 20-րդ դարի սկզբին իսկապես ցեղասպանություն է իրագործել ու Թուրքիան կարող է Գերմանիային էլ «մեյդան» բերել: Եթե դա իրոք այդպես է, ակնհայտ է դառնում, որ նա ծանոթ չէ բանաձեւի տեքստին, որտեղ ըստ aysor.am-ի հրապարակած թարգմանության, հստակ գրված է հետեւյալը:
«Բունդեսթագը ցավում է Գերմանական Կայսրության անփառունակ դերի համար, որը որպես Օսմանյան Կայսրության գլխավոր ռազմական դաշնակից, չնայած հայերի կազմակերպված տեղահանումների և բնաջնջման մասին նաև գերմանացի դիվանագետների և միսիոնարների կողմից հաղորդված միանշանակ տեղեկություններին, անգամ չփորձեց կասեցնել մարդկության դեմ իրագործվող այդ հանցագործությունը: Այս ոգեկոչմամբ Գերմանիայի Բունդեսթագը արտահայտում է իր հատուկ հարգանքը երկրագնդի թերևս հնագույն քրիստոնյա ժողովրդի հանդեպ»:
«Գերմանիայի Բունդեսթագը հիշում է այս իրադարձությունները` նաև Առաջին համաշխարհային պատերազմի մասին հիշողության համատեքստում: Գերմանական կայսրությունը Օսմանյան կայսրության գլխավոր ռազմական դաշնակիցն էր: Տեղյակ լինելով հայերի հետապնդումների և սպանությունների մասին, Գերմանական կայսրության այն ժամանակվա կառավարությունը այնուամենայնիվ ոչինչ չձեռնարկեց: Գերմանիայի Դաշնային Հանրապետությունը պատասխանատվություն է կրում այս հանցագործության հետ առերեսման և դրա մասին հիշողությունը արթուն պահելու համար օժանդակություն ցուցաբերելու գործում»:
Կարդացեք նաև
Աշոտ ՀԱԿՈԲՅԱՆ
Լուսանկարը՝ norturk.no-ի
