Գերիների, պատանդների եւ անհայտ կորածների հարցերով ՀՀ հանձնաժողովի անդամ, ՀՀ առաջին օմբուդսմեն Լարիսա Ալավերդյանը պատրաստվում է այցելել հունիսի 7-ին ՀՀ տարածք անցած Ադրբեջանի քաղաքացուն: Aravot.am-ի հետ զրույցում Լարիսա Ալավերդյանը տեղեկացրեց, որ ներկայումս աշխատում են կնոջն այցելելու ուղղությամբ: «Մենք հիմա այդ հարցով զբաղվում ենք: Այս պահին նախեւառաջ ցանկանում ենք տեղեկանալ նրա վիճակի եւ այցելության հնարավորության մասին, ինչից հետո կարող ենք ինչ-որ բան նախաձեռնել: Հնարավոր է, որ նրա վերադարձն ավելի շուտ վրա հասնի, քան մեր այցելությունը, նման նախադեպեր եղել են»:
Կնոջ իրավունքների մասով տիկին Ալավերդյանը նշեց. «Նա ամբողջապես կրում է այն իրավունքները, որոնք նշված են Ժնեւյան համապատասխան կոնվենցիայում: Համոզված եմ, որ նրա բոլոր իրավունքներն ապահովված են»:
Լարիսա Ալավերդյանը Զոհրա Վալիեւայի` գյուղից գյուղ անցնող գուշակ լինելու մասին տեղեկություններն «ավելորդ խոսակցություն» որակեց: «Կա նրա կարգավիճակը, որն է` սահման անցած եւ տվյալ դեպքում գերության մեջ հայտնված կին»,-եզրափակեց մեր զրուցակիցը:
Ավելի վաղ լրատվամիջոցները գրել էին, որ Կարմիր խաչի միջազգային կոմիտեի հայաստանյան գրասենյակի հաղորդակցման ծրագրերի ղեկավար Զառա Ամատունու տեղեկացմամբ` ԿԽՄԿ ներկայացուցիչներն այցելել են կնոջը:
Կարդացեք նաև
Լուիզա ՍՈՒՔԻԱՍՅԱՆ
