Փոխվարչապետ Վաչե Գաբրիելյանը հարկային նոր օրենսգրքի վերաբերյալ խորհուրդ է տալիս չսահմանափակվել միայն գործարաների կարծիքով, այլ երբեմն լսել նաև ՊԵԿ փոխնախագահ Վախթանգ Միրումյանի պարզաբանումները: Այսօր լրագրողների հետ զրույցում Վաչե Գաբրիելյանը, պատասխանելով դիտարկմանը, թե իշխանության գործարար թևը դեմարշի է ենթարկել հարկային նոր օրենսգրքի նախագիծը, ենթադրվո՞ւմ է, որ նրանց պահանջով փոփոխություններ կկատարվեն, ասաց. «Իսկ դուք միայն գործարարների եք լսում: ՊԵԿ փոխնախագահ պարոն Միրումյանը ներկայացրեց, թե ինչ հեշտացնող փոփոխություններ են արվել: Բնականաբար մեր գործարար հանրությունը ուզում է հեշտացնող մեխանիզմներ, բայց սահմանափակող խնդիրներ չլինեն: Ունենք Ազգային ժողով, որտեղ տեղի են ունենում քննարկումներ և հուսով եմ, որ քննարկումների արդյունքում կունենանք բարեփոխված հարկային օրենսգիրք»:
Կոռուպցիայի դեմ պայքարի հետ կապված փոխվարչապետը վստահեցրեց, որ առաջընթաց այդ ոլորտում կա. «Ճիշտ է ամեն ինչ դանդաղ է ընթանում, բայց այն տեսանելի է»:
Գաբրիելյանը շարունակեց, թե իրենք կոռուպցիայի դեմ պայքարում միջազգային կազմակերպությունների չորս անկախ փորձագետների են ներգրավել, որոնք պետք է վեր հանեն կրթության, հարկային մարմինների, ոստիկանության և առողջապահության ոլորտի ախտերը և առաջարկեն դրանց լուծումները:
Հարցին՝ մի՞թե մեր իշխանությունները չգիտեն, թե որոնք են այդ ոլորտի ախտերը, որ աստղաբաշխական գումարներով փորձագետներ են վարձում, Գաբրիելյանն ասաց. «Ախտանիշները բազմազան են, դուք չգիտեք դրսևորումները, դուք չգիտեք դրանց լուծման ձևերը, հիմա այդ ամբողջ աշխատանքները կատարվում են»:
Կարդացեք նաև
Նելլի ԲԱԲԱՅԱՆ
