Մարդու իրավունքների եվրոպական դատարանը եվրոպական կոնվենցիայի` խոշտանգումներն արգելող հոդվածով 2015-ի դրությամբ ՀՀ-ի դեմ կայացրել է 12 վճիռ:
«Մեդիա կենտրոնում» հրավիրված քննարկմանը «Իրավունքների պաշտպանություն առանց սահմանների» ՀԿ-ի ղեկավար Հայկուհի Հարությունյանն այս թեմայով որոշ այլ մտահոգիչ տվյալներ ներկայացրեց. «Խոշտանգումների վերաբերյալ ստացված 363 հաղորդումների հիման վրա ընդամենը յոթ քրեական գործ է հարուցվել, բայց քրեական պատասխանատվության ենթարկվելու ոչ մի դեպք չի գրանցվել»:
Տիկին Հարությունյանը ևս մեկ մտահոգիչ փաստ հիշատակեց. «Խոշտանգումների գործով մարդու իրավունքների Եվրոպական դատարանի կոմիտեն սահմանել է վերահսկողության ուժեղացված ռեժիմ Հայաստանի համար, քանի որ ոչ մի համակարգային փոփոխություն տեղի չի ունենում այս ուղղությամբ մեր երկրում, ինչը մտահոգիչ է»:
Հայկուհի Հարությունյանը նշեց, որ քրեական օրենսգրքի փոփոխությունները որևէ իրական փոփոխության չհանգեցրին. «Օրենսդրության փոփոխություն ֆորմալ առումով մենք ունենք. երկար քննարկումների և քննադատության արդյունքում 309 պրիմ 1 հոդվածն ընդունվեց, բայց դա միայն միջազգային պարտավորությունները ապահովելու համար էր»:
Կարդացեք նաև
Այս առիթով փաստաբան Հայկ Ալումյանը նկատեց. «Այս փոփոխությամբ միջազգային պահանջները կատարվեցին, որ երբ հերթական դրամաշնորհը պետությանը տալու լինեն, չասեն, որ ձեր պարտավորությունները չեք կատարում: Բայց իրականում ոչինչ չփոխվեց»:
Պարոն Ալումյանը նաև մտահոգություն հայտնեց, որ հայ հասարակությունն անթույլատրելի կերպով հանդուրժողական է խոշտանգումների նկատմամբ. «Եթե ասում ենք, որ ՔԿՀ-ում կալանավորվածի նկատմամբ խոշտանգում է տեղի ունեցել, հասարակության գերակշռող մեծամասնությունն ասում է` հենց վատ էլ պետք է հետը վերաբերվեին, մի երկու հատ էլ պիտի ապտակեին: Իմ եզրահանգումն այն է, որ հասարակությունը պատրաստ չէ եվրոպական չափանիշներին»:
Տաթև ՀԱՐՈՒԹՅՈՒՆՅԱՆ
Լուսանկարը` «Մեդիա կենտրոն»-ի
