Այսօր Շենգավիթ վարչական շրջանի ընդհանուր իրավասության դատարանում ծննդկան Մերի Մարգարյանի եւ նրա նորածնի մահվան գործով դատական նիստին եկել էր ՀՀԿ խմբակցության պատգամավոր Նաիրա Կարապետյանը:
Նա մեզ հետ զրույցում ասաց, որ Մերիի հետ ընկերուհիներ են եղել. «Հաշվի առնելով գործի հնչեղությունը եւ ողբերգության աստիճանը, նաեւ այն, որ մեղադրվող կողմը, քանի դեռ չկա ոչ արդարացման, ոչ էլ մեղադրական եզրակացություն, շարունակում է աշխատել, դա առնվազն բարոյական չէ: Փորձագիտական հանձնաժողովը որոշում է կայացրել, վստահ եմ, դատարանը ճիշտ վճիռ կկայացնի: Ես ինքս Մերիին ճանաչել եմ մանկությունից, նրա հղիության ընթացքը, բարդությունները եւ թե այս ողբերգությունը, որը տեղի ունեցավ նրանց ընտանիքի հետ, իմ աչքի առաջ են, եղել է իմ մասնակցությամբ, իմ կողքին: Մի քանի անգամ լսել եմ հեռախոսազրույցները Մերիի եւ բժշկուհու՝ Շուշանիկ Բախշյանի միջեւ, ես կխնդրեի այս պահին չհայտնել իմ կարծիքը: Ասեմ, որ բժիշկը եղել է ոչ պատշաճ եւ ոչ բավարար կերպով անհանգստացած հղիի վիճակով: Վերջիվերջո գոյություն ունի նախարարի հրաման, ըստ որի, ցանկացած ջերմող հղի առնվազն պետք է հոսպիտալացվի, իսկ նրան անգամ չեն էլ ստուգել: 3 անգամ հետ ուղարկելով տուն, պնդելով, թե չէ, պետք է մնալ…Ես հիմա ցավով եմ հիշում Մերիի անվերջ վստահությունն իր բժշկուհու հանդեպ: Կարծես հիպնոսի տակ լիներ մեր Մերին, նա չէր համաձայնում այլ բժշկի դիմել»:
Մեր հարցին՝ Դուք առաջարկե՞լ եք, որ նա փոխի բժշկին՝ Նաիրա Կարապետյանը պատասխանեց. «Մեր հղիության տարբերությունը մի քանի ամսվա է եղել, անգամ Մերին հիվանդանոց իմ շորերով է գնացել: Իհարկե, ես առաջարկել եմ թե՛ իմ բժիշկներին, թե՛ այն հիվանդանոցը, որտեղ իմ աղջիկն է ծնվել: Ցավոք, Մերին վստահում էր Շուշանիկին: Ցավոք, անգամ այն վերջին վայրկյաններին, երբ նա կյանքի եւ մահու կռիվ էր տալիս, նա կոչ էր անում Շուշանիկին չնեղացնել: Ինչին ի հակառակ՝ Շուշանիկը հոգեբանական ճնշում էր գործադրում, ասում էր՝ վիճակդ նայի, դու սենց չես կարողանա ծննդաբերես: Աղջիկը մահամերձ լաց էր լինում, ասում էր՝ ես ծննդաբերելու եմ, ես երեխաներ եմ ունենալու»:
Նաիրա Կարապետյանն ասաց, որ Մերիի ընտանիքը, բնականաբար, Մերիին էլ երբեք չի վերադարձնի, բայց դատավարության գլխավոր նպատակն այն է, որ ով մեղավոր է՝ պատժվի, սա մարդասիրական քայլ է՝ այլ ողբերգություններ կանխելու համար:
Կարդացեք նաև
Նաիրա Կարապետյանից հետաքրքրվեցինք՝ ըստ Ձեզ, պետք է թույլ չտայի՞ն Շուշանիկ Բախշյանին, որ շարունակեր աշխատել, քանի դեռ քրեական գործի քննությունը չի ավարտվել՝ նա պատասխանեց, որ պետք է բժշկուհին ներքին զսպվածություն ունենար եւ նման ռիսկի մարդկանց չենթարկեր»:
Պատգամավորն ասաց, որ ինքն էլ բժիշկ-գինեկոլոգների ընտանիքից է ու տեսնում է, թե ինչպես են նրանք գիշերվա ցանկացած ժամի կես բերան գանգատի դեպքում սլանում հիվանդանոց, օրերով տուն չեն գալիս. «Բժիշկը ամենապատասխանատու, ամենանվիրական մասնագիտությունն է: Ես տեսել եմ Մերիի՝ անուշադրության մատնված լինելը»:
Նաիրա Կարապետյանը հուզվում էր, երբ պատմում էր Մերիի նպատակների, երազանքների մասին. «Ասում էր՝ 4 երեխա եմ ունենալու, իմ ուժերով եմ ունենալու: Ասում էր՝ ես չեմ գնա ուրիշ բժշկի մոտ, որովհետեւ Շուշանիկն ասել է՝ բոլորը գումարի խաթր կեսարյան հատում են անում, ես ուզում եմ իմ ուժերով դեռ 4 երեխա ունենալ: Ընդամենը 1 տարի առաջ գեղեցիկ ընտանիք էին կազմել, առանձին տուն էին առել, ամեն մի կահույքի գնումը նշում էին, ապրում էին կատարյալ երջանիկ կյանքով: Ամուսինը մինչ օրս չի կարողանում համակերպվել: 1 տարի է անցել, պատկերացնում եք, ամեն օր առավոտյան, երեկոյան այցելում է Մերիին, զրուցում է, ծաղիկներ է տանում: Դա սարսափելի մի տեսարան է, Աստված հեռու տանի բոլորի տնից»:
Նաիրա Կարապետյանն ասաց, որ Մերին բալիկի ծննդյանը առանձնահատուկ է պատրաստվել, ամեն ինչ գնել է. «Ցավոք, բալիկը 1 օր ապրեց»:
Պատգամավորը հույս ունի, որ դատավոր Դավիթ Բալայանը արդար վճիռ կկայացնի:
Հռիփսիմե ՋԵԲԵՋՅԱՆ
