Աջափնյակ եւ Դավիթաշեն վարչական շրջանների Ընդհանուր իրավասության դատարանում այսօր` հուլիսի 7-ին դատավոր Վարդան Աբրահամյանի նախագահությամբ շարունակվեց հիրոմանտ, էքստրասենս Անի Մաջնունյանի սպանության գործով
քննությունը:
Մաջնունյանի սպանության մեջ մեղադրվում է «Յանուս» արտիստական թատրոնի տնօրեն եւ գլխավոր ռեժիսոր, 1995 թ. ծնված Մուշեղ Մխիթարյանը:
Այսօրվա նիստին հարցաքննվեցին երկու վկաներ: Նրանցից մեկը` Արամը, դատարանին հայտնեց, որ այս գործով մեկ այլ վկաներից մեկին` Աննային, ով նշել էր, որ տեսել է արնաքամ լինող Անի Մաջնունյանին, ճանաչում է Սունդուկյանի թատրոնի հարակից այգուց, որտեղ «Մաֆիա» են խաղացել:
Ըստ Արամի` Աննան պատմել է դեպքի մասին ու ասել, որ վախեցած է, Արամն էլ խորհուրդ է տվել դիմել ոստիկանություն. «Իր պատմելով` ընկերոջ հետ է եղել Մաջնունյանի տանը: Քանի որ ես աշխատել եմ «օրգանում», ինձ թույլ չտվեցի մանրակրկիտ հարցեր տալ: Որքան ինձանից հասնում էր` նրան խորհուրդ տալ, տվել եմ: Ասեցի` եթե դու մեղավոր չես, գնա ոստիկանություն ու ասա»:
Կարդացեք նաև
Մաջնունյանի սպանության մեջ մեղադրվող Մուշեղ Մխիթարյանը հարցեր ուղղեց վկային.
-Ո՞ր համակարգում եք աշխատել:
-Զինվորական ոստիկանություն:
-Ձեր նախաքննական ցուցմունքում նշված է, որ դատապարտված եք եղել:
-Ասենք հա:
-Հետաքրքիր է` ինչի՞ համար:
-Գողության…
Դատավորն ընդհատեց ամբաստանյալին` ասելով, որ գործին առնչվող հարցեր տա:
Մյուս վկան` Վահագն Խաչատրյանը, դատարանին ասաց, որ ճանաչում է Անի Մաջնունյանի մորը որպես հարեւան եւ նրանց կողքի բնակարանում ապրել է մի քանի ամիս: Խաչատրյանն ասաց, որ Մաջնունյանի հետ շփում չի ունեցել եւ չգիտի, թե ում հետ էր շփվում էքստրասենսը եւ արդյոք ունեցե՞լ է ֆինանսական խնդիրներ. «Նրանց տուն շատ մարդ էր գալիս…»:
Դատախազի հարցերին ի պատասխան Վահագնը հայտնեց, որ Մաջնունյանի սպանության օրը աղմուկ չի լսել, թեեւ հարեւան դռան թակոցի ձայներն ամեն օր էլ լսվում են:
Ամբաստանյալ Մուշեղ Մխիթարյանը հետաքրքրվեց` «Պատկերացրեք, որ Անիի բնակարանի դուռը բացվում է, ինչ-որ մեկը վազելով աստիճաններով իջնում է: Աստիճանավանդակի աղմուկը կլսեի՞ք»: «Երեւի թե` այո, չեմ կարող ասել, եթե քնած եմ եղել, կարող է եւ չլսեի»,-պատասխանեց վկան:
Հարցաքննության ավարտից հետո դատավորը կողմերին տեղեկացրեց, որ դատարան բերման ենթարկելու որոշում է կայացվել երեք վկայի հանդեպ, որոնցից Հռիփսիմե Հակոբյանը գտնվում է Կիպրոսում, իսկ մյուս երկուսին դեռ չի հաջողվել դատարան հրավիրել: Պաշտպանական կողմը պնդեց, որ նրանց ներկայությունն ապահովվի, իսկ ահա Հռիփսիմե Հակոբյանի նախաքննական ցուցմունքը հրապարակվեց: Նա վարձով բնակարան է հատկացրել, որտեղ Մխիթարյանը բնակվել է կնոջ եւ երեխայի հետ:
Հաջորդ դատական նիստը նշանակվեց օգոստոսի 22-ին, ժամը 15:00-ին:
Լուիզա ՍՈՒՔԻԱՍՅԱՆ