Աջափնյակ եւ Դավիթաշեն վարչական շրջանների Ընդհանուր իրավասության դատարանում այսօր` մայիսի 20-ին, դատավոր Վարդան Աբրահամյանի նախագահությամբ, շարունակվեց հիրոմանտ, էքստրասենս Անի Մաջնունյանի սպանության գործով քննությունը:
Հիշեցնենք, որ Մաջնունյանի սպանության մեջ մեղադրվում է «Յանուս» արտիստական թատրոնի տնօրեն եւ գլխավոր ռեժիսոր, 1995 թ. ծնված Մուշեղ Մխիթարյանը:
Նիստը սկսվեց ուշացումով, քանի որ գործով ամբաստանյալ Մուշեղ Մխիթարյանի ինքնազգացողությունը վատացել էր, նրան օգնություն էին ցուցաբերել շտապօգնության բժիշկները: Դատավորի հարցմանն ի պատասխան՝ Մխիթարյանն ասաց, որ արդեն լավ է զգում իրեն:
Այս նիստին ներկայացել էր տուժողի իրավահաջորդի շահերի ներկայացուցիչը, որը դատավորից խնդրեց նիստը հետաձգել` գործի նյութերին ամբողջությամբ ծանոթանալու եւ պատշաճ ներկայացուցչություն իրականացնելու համար:
Կարդացեք նաև
Հիշեցնենք, որ նախորդ նիստին տուժողի իրավահաջորդ էր ճանաչվել սպանված էքստրասենս Անի Մաջնունյանի մայրը:
Դատարան էր եկել նաեւ գործով վկաներից մեկը, որը նախորդ մի քանի նիստերին չէր ներկայացել: Դատավոր Աբրահամյանը հարցրեց, թե ինչն է պատճառը: Վկա Խաչատրյանն էլ ասաց, որ «դատարանի նամակներն ուշ է ստացել»:
Հաշվի առնելով տուժողի իրավահաջորդի շահերի պաշտպանի ասածը` դատավորը վկային տեղեկացրեց, որ հաջորդ դատական նիստին ներկայանա, քանի որ այսօրվանը հետաձգվում է:
Նիստի ավարտին Մուշեղ Մխիթարյանը շարունակեց իր պաշտպանի հետ զրույցում պնդել, որ չի ցանկանում մասնակցել նիստերին:
Առաջիկա նիստի օրը դատարանը կհայտարարի լրացուցիչ:
Լուիզա ՍՈՒՔԻԱՍՅԱՆ
