«Եղնուկյանն անտեղյակ է, ինքը չգիտի, թե ինչի մեջ են ուզում իրեն ներքաշել, քանի որ այս պահին մանրամասն չեն ներկայացրել»,-Aravot.am-ի հետ զրույցում ասաց Կարո Եղնուկյանի պաշտպան, փաստաբան Տիգրան Հայրապետյանը:
«Հիմնադիր խորհրդարանի» եւ ԱԻՄ-ի անդամ Կարո Եղնուկյանին գիշերը 2.30-3.00-ի սահմաններում ձերբակալել են «Սասնա ծռեր» խմբին օժանդակելու եւ նրանց հետ հեռախոսային կապ ունենալու համար:
«Ներկայացնում են, որ միջադեպը կատարվելուց հետո (նկատի ունի ՊՊԾ գնդի վրա ամսի 17-ի հարձակումը-Ն. Գ. ) ինքն ինչ-որ գործողություններով աջակցել է, որ այդ խումբն իր ազդեցության տակ պահի շինություններ, զենքեր»,- ասաց Տիգրան Հայրապետյանը:
Այս հիմքով Կարո Եղնուկյանին կարող են 72 ժամ պահել, հետո պետք է մանրամասն մեղադրանք ներկայացնեն, թե ի՞նչ գործողություններ է արել կամ էլ ազատ արձակեն: Փաստաբանն ասաց, որ կսպասեն մինչեւ սահմանված ժամկետը եւ մեղադրանքի առաջադրումը:
Կարդացեք նաև
«Բայց այս տրամաբանությամբ առաջնորդվենք, բոլորին պետք է ձերբակալեն»,- հավելեց Կարո Եղնուկյանի պաշտպանը`նկատի ունենալով, որ շատերն են «Սասնա ծռերի» հետ այս ընթացքում կապի մեջ եղել:
Փաստաբանը հավելեց միայն, որ իր պաշտպանյալը առողջական խնդիր ունի, գիշերը շնչառական սարքով պետք է քնի, ու իր անազատության մեջ գտնվելը շատ անհարմար է այդ առումով. «Գիշերը սարքը տանից բերել ենք, բայց դե մեկ է, անհարմար է»:
Նելլի ԳՐԻԳՈՐՅԱՆ
